محترمہ فاطمہ جناح کی قومی خدمات کو تاریخ میں یاد رکھا جائے گا،ڈاکٹر ہارون الرشید تبسم

بدھ 9 جولائی 2025 23:15

سرگودھا (اُردو پوائنٹ اخبارتازہ ترین - اے پی پی۔ 09 جولائی2025ء) پروفیسر (ر) ڈاکٹر ہارون الرشید تبسم نےمادر ملت محترمہ فاطمہ جناح کی 58 ویں برسی کے موقع پر کہا ہے کہ ہم محترمہ فاطمہ جناح کو ملک و ملت کے لیے خدمات پر خراجِ تحسین پیش کرتے ہیں ۔انہوں نے کہا کہ محترمہ فاطمہ جناح ایک باہمت، بااصول ،بلند حوصلہ اور متحرک شخصیت کی مالک خاتون تھیں، خاص طور پر مادرِ ملت کا کردار خواتین کے لیے عزم، حوصلے اور رہنمائی کا سر چشمہ ہے ۔

(جاری ہے)

ڈاکٹر ہارون الرشید تبسم نے کہا کہ محترمہ فاطمہ جناح ناصرف بانی پاکستان قائداعظم محمد علی جناح کی جان نثار اور دستِ راست بہن تھیں بلکہ وہ تحریکِ آزادی کے ہر مرحلے میں قائداعظم کے شانہ بشانہ رہیں۔ انہوں نے مزید کہا کہ محترمہ فاطمہ جناح خواتین کی تحریکِ آزادی کی صفِ اول کی رہنماء تھیں، قیامِ پاکستان کے بعد محترمہ فاطمہ جناح نے عملی سیاست میں بھرپور کردار ادا کیا۔فاطمہ جناح عوام، بالخصوص خواتین کی فلاح و بہبود کے لیے ہمیشہ سرگرم رہیں، محترمہ فاطمہ جناح کی قومی خدمات کو تاریخ میں یاد رکھا جائے گا۔