Live Updates

سرگودہا میں موسلادھاربارش کے بعد نکاسی آب کا ہنگامی آپریشن، کمشنر و ڈپٹی کمشنرمتحرک

جمعرات 10 جولائی 2025 17:24

سرگودہا (اُردو پوائنٹ اخبارتازہ ترین - اے پی پی۔ 10 جولائی2025ء) سرگودہا شہر میں موسلادھار بارش کے بعد انتظامیہ فوری طور پر متحرک ہو گئی۔ کمشنر سرگودہا ڈویژن جہانزیب اعوان نے تمام متعلقہ انتظامی افسران کو ہنگامی ہدایات جاری کرتے ہوئے کہا کہ وہ اپنے اپنے نامزد علاقوں میں پہنچیں اور شہریوں کو درپیش مسائل کو فوری طور پر حل کیا جائے۔ ڈپٹی کمشنر سرگودہا کیپٹن (ر) محمد وسیم نے بارش کے فوراً بعد شہر کے مختلف علاقوں کا دورہ کیا اور ڈسپوزل اسٹیشنز سمیت نکاسی آب کے تمام انتظامات کا موقع پر جا کر تفصیلی جائزہ لیا۔

سی او ایم سی ماجد بن احمد بھی اس موقع پر ان کے ہمراہ تھے۔ ڈپٹی کمشنر نے نکاسی آب کے لیے بھرپور آپریشن شروع کرنے کا حکم دیتے ہوئے کہا کہ میونسپل کارپوریشن کی تمام مشینری، سکر مشینیں، ڈی واٹرنگ سیٹس اور افرادی قوت کو مکمل طور پر متحرک کر دیا گیا ہے۔

(جاری ہے)

نشیبی علاقوں میں پانی کی فوری نکاسی کو یقینی بنانے کے لیے ٹیمیں مسلسل متحرک ہیں، جبکہ شہر کی مرکزی شاہراہوں پر بھی نکاسی آب کا کام تیز رفتاری سے جاری ہے تاکہ ٹریفک کی روانی بحال رکھی جا سکے۔ڈپٹی کمشنر کیپٹن نے شہریوں سے اپیل کی کہ وہ بجلی کے پولز، تاروں، واپڈا کی دیگر تنصیبات اور پانی بھرے مقامات سے دور رہیں تاکہ کسی ناخوشگوار واقعہ سے بچا جا سکے۔