صدر مملکت کے حوالے سے بے بنیاد خبریں پھیلانے کا مقصد ملک میں عدم استحکام پیدا کرنا ہے‘ سردار سلیم حیدر خان

ملکی ترقی کے لئے اداروں میں میرٹ کی بالادستی ناگزیر ہے‘ گورنر پنجاب سے چیئرمین سی ڈی اے محمد علی رندھاوا کی ملاقات

جمعرات 10 جولائی 2025 21:20

لاہور(اُردو پوائنٹ اخبارتازہ ترین - این این آئی۔ 10 جولائی2025ء)گورنر پنجاب سردار سلیم حیدر خان نے کہا کہ ملکی ترقی کے لئے اداروں میں میرٹ کی بالادستی ناگزیر ہے۔ صدر مملکت کے حوالے سے بے بنیاد خبریں پھیلانے کا مقصد ملک میں عدم استحکام پیدا کرنا ہے۔یہ بات اُنہوں نے پنجاب ہائوس اسلام آباد میں چیئرمین سی ڈی اے محمد علی رندھاوا سے ملاقات کے دوران کہی۔

گورنر پنجاب سردار سلیم حیدر خان نے کہا کہ سی ڈی اے کی کارکردگی میں بہتری لانے کے لیے مزید اقدامات کی ضرورت ہے۔اُنہوں نے کہا کہ ملک میں ترقی کے لیے اداروں میں میرٹ کی بالادستی بہت ضروری ہے۔گورنر پنجاب نے کہا کہ حکومت اداروں کی کارکردگی کو بہتر بنانے کے لیے اقدامات کررہی ہے ۔اُنہوں نے مزید کہا کہ صدر مملکت کے حوالے سے بے بنیاد خبریں پھیلانے کا مقصد صرف اور صرف ملک میں عدم استحکام پیدا کرنا ہے۔

(جاری ہے)

گورنر پنجاب نے کہا کہ ملک میں سیاسی استحکام سے معاشی ترقی کے اشاریے بہتری کی طرف گامزن ہیں۔اُنہوں نے کہا کہ ملک کو اس جگہ لے کر جانا ہے جس کے لیے یہ بنا تھا۔ گورنر پنجاب نے کہا کہ ملک کی ترقی اور استحکام کے لیے سب کو اپنا مثبت حصہ شامل کرنا ہے۔اس موقع پر چیئرمین سی ڈی اے محمد علی رندھاوا نے گورنر پنجاب کو ادارے کی کارکردگی کے حوالے سے بریفنگ دی۔ گورنر پنجاب نے سی ڈی کی کارکردگی میں بہتری لانے پر محمد علی رندھاوا کی کاوشوں کو سراہا۔