ڈیفنس میں رہائشی عمارت کی چھت سے گر کر 5 بچوں کی ماں جاں بحق

ابتدائی تحقیقات میں واقعہ بلندی سے چھلانگ لگا کر خودکشی کا معلوم ہوتا ہے،پولیس حکام

جمعہ 11 جولائی 2025 13:38

ڈیفنس میں رہائشی عمارت کی چھت سے گر کر 5 بچوں کی ماں جاں بحق

کراچی(اُردو پوائنٹ اخبارتازہ ترین - این این آئی۔ 11 جولائی2025ء)کراچی میں درخشاں کے علاقے ڈیفنس فیز فائیو بدر کمرشل دہلی ریسٹورنٹ کے قریب رہائشی عمارت سے گر کر خاتون جاں بحق ہوگئی جو کہ 5 بچوں کی ماں تھی۔متوفیہ کی لاش ضابطے کی کارروائی کے لیے جناح اسپتال لے جائی گئی۔

(جاری ہے)

ایس ایچ او درخشاں شاہد تاج نے بتایا کہ متوفیہ کی شناخت 45 سالہ ندا زوجہ ذوالفقار کے نام سے کی گئی ہے جبکہ ابتدائی تفتیش میں واقعہ عمارت کی چھت سے چھلانگ لگا کر خودکشی کا معلوم ہوتا ہے۔متوفیہ کے شوہر نے پولیس کو بتایا کہ ندا نفسیاتی مسائل اور ذہنی دبائو کا شکار تھی جبکہ وہ عمارت کی تیسری منزل پر رہائش پذیر ہیں اور اس کی بیوی نے چھت پر جا کر چھلانگ لگائی تھی۔پولیس اس حوالے سے مزید چھان بین کررہی ہے۔