ناشتے میں مستقل شہد استعمال کرنیوالے بھی کسی بیماری کا شکار نہیں ہوتے، فوڈ نیوٹریشنسٹ

جمعہ 11 جولائی 2025 14:20

فیصل آباد (اُردو پوائنٹ اخبارتازہ ترین - اے پی پی۔ 11 جولائی2025ء) محکمہ صحت کے ممتاز فوڈ نیوٹریشنسٹ ڈاکٹر محمد عمران نے بتایا کہ زیتون میں 76بیماریوں کاعلاج موجود ہے جبکہ جوشخص مستقل طور پر ناشتے میں تھوڑاسا شہد استعمال کرتا رہتاہے اسے بھی کوئی بڑی بیماری لاحق نہیں ہو تی نیزدیسی گھی،کھجوریں،کلونجی اور دیگر اشیا کی بھی بہت زیادہ افادیت ہے لہٰذااگر آج بھی ہم ان قدرتی غذاؤں کااستعمال شروع کردیں تو یقینا بہت سی لاعلاج بیماریوں سے نہ صرف محفوظ ہوجائیں گے بلکہ تندرست اور توانا بھی رہیں گے۔

ملاوٹ پر فرمان نبوی ﷺکے حوالے سے اے پی پی سے بات چیت میں انہوں نے بتایا کہ ارشادنبویؐ ہے کہ ”ملاوٹ کرنیوالا ہم میں سے نہیں ہے‘‘ اور ایک ایماندار اورصالح تاجر کی شان یہ ہے کہ وہ بروز قیامت انبیائے کرامؑ،صدیقین ؓاور شہدا کیساتھ اٹھایا جائیگا۔

(جاری ہے)

انہوں نے بتایاکہ گھی،نمک،مصالحہ جات اور دیگر روزمرہ استعمال کی اشیا میں خطرناک حد تک ملاوٹ ہورہی ہے جس کی وجہ سے لاعلاج امراض تیزی سے پھیل رہی ہیں اسلئے ملاوٹ کرنیوالے عناصر کے خلاف نہ صرف سخت ایکشن لینابلکہ اس سلسلہ میں متعلقہ قوانین پر سختی سے عملدرآمدکرواتے ہوئے سخت سزاؤں سمیت نشاندہی کرنیوالوں کی بھی حوصلہ افزائی ہونی چاہیے۔

انہوں نے بتایاکہ چٹ پٹے کھانوں میں جومصالحہ جات استعمال ہورہے ہیں وہ انسانی جسمانی صحت کیلئے انتہائی نقصان دہ ہیں۔ انہوں نے کہاکہ چینی جسے سفید زہر کہاجاتاہے اس کااورکولڈ ڈرنکس جیسے مشروبات (بوتلوں)کاحد سے زیادہ استعمال بھی صحت کیلئے مضرہے۔