وزیر اعلی مریم نواز سیلاب متاثرین کیلئے جلد بڑے ریلیف پیکج اعلان کریں گی، سروے کے لیے 10 ہزار سرکاری ملازمین تعینات کر دیے گئے ہیں، عظمی بخاری

لاہور (اُردو پوائنٹ اخبارتازہ ترین - اے پی پی۔ 08 ستمبر2025ء) وزیر اطلاعات و ثقافت پنجاب عظمی بخاری نے کہا ہے کہ پنجاب اس وقت شدید موسمی صورتحال کا سامنا کر رہا ہے۔ چار ماہ سے جاری بارشوں اور سیلاب نے عوام کی زندگیوں کو متاثر کیا ہے مگر پنجاب حکومت نے بروقت اقدامات اٹھاتے ہوئے ریلیف اور ریسکیو آپریشنز میں ایسی مثال قائم کی ہے جو ملکی تاریخ میں نہیں ملتی۔

ان خیالات کا اظہار انہوں نے پیر کو ڈی جی پی آر میں پریس کانفرنس میں کیا۔عظمی بخاری نے کہا کہ سیلاب سے 4355مواضعات متاثر ہوئے ہیں جبکہ متاثرہ آبادی کا حجم 41 لاکھ 99 ہزار 462 افراد تک پہنچ گیا ہے۔ اب تک 21 لاکھ 47 ہزار 646 افراد اور 15 لاکھ 49 ہزار 704 مویشی محفوظ مقامات پر منتقل کیے جا چکے ہیں۔ اس وقت صوبے بھر میں 412 ریلیف کیمپ قائم ہیں جن میں 68 ہزار 980 افراد رہائش پذیر ہیں۔

(جاری ہے)

متاثرین کے علاج اور سہولت کے لیے 492 میڈیکل کیمپ قائم کئے گئے ہیں جن میں لاکھ 93 ہزار 806 افراد کا علاج کیا جا چکا ہے۔ اس کے علاوہ 432 ویٹرنری کیمپ قائم کیے گئے ہیں۔انہوں نے کہا کہ سیلاب سے60 افراد جاں بحق اور 8 زخمی ہوئے ہیں جبکہ1543مویشی ہلاک ہوئے ہیں۔ سیلاب سے زیرِ کاشت 18 لاکھ 41 ہزار 581 ایکڑ رقبہ متاثر ہوا ہے جس کے باعث دالوں اور سبزیوں کی قیمتوں میں اضافہ ہوا ہے۔

وزیر اطلاعات نے مزید کہا کہ 10 ہزار سرکاری ملازمین سروے کے لیے تعینات کر دیے گئے ہیں۔وزیر اعلی پنجاب جلد ایک بڑے ریلیف پیکج کا اعلان کریں گی اور آفات سے نمٹنے کے لیے شارٹ، میڈیم اور لانگ ٹرم پلاننگ کی جا رہی ہے۔ڈینگی کے حوالے سے عظمی بخاری نے کہا کہ ڈینگی کے سیزن میں محکمہ صحت اور انتظامیہ پوری طرح فعال ہیں۔ جہاں پانی اتر گیا ہے وہاں ڈینگی سرویلنس اور سپرے کا عمل شروع کر دیا گیا ہے۔

انہوں نے بتایا کہ متاثرہ علاقوں میں 2 لاکھ 38 سو لیٹر صاف پانی اور مزید پانچ لاکھ لیٹر پانی متاثرین تک پہنچایا گیا ہے، جبکہ ایک لاکھ 60 ہزار بوتلیں بھی فراہم کی گئی ہیں۔ ایک سوال کے جواب میں عظمی بخاری نے کہا کہ سیلاب کے بعد سٹرکچرل اور لیگل ریفارمز کی جائیں گی جن پر وزیر اعلی نے کام شروع کر دیا ہے۔بھارتی پنجاب کے کسانوں کے نقصان پر اظہار یکجہتی کرتے ہوئے انہوں نے کہا کہ سنہرا پنجاب جو پورے بھارت کو کھلاتا ہے، آج خود شدید متاثر ہے۔

گجرات کے سیوریج نظام پر بات کرتے ہوئے انہوں نے کہا کہ ماضی میں اربوں روپے خرچ کرنے کے باوجود وہاں سیوریج سسٹم موجود نہیں ہے۔ ن لیگ اس منصوبے کو مکمل کر کے دکھائے گی۔ذخیرہ اندوزی اور آٹے اور روٹی کی قیمتوں پر زیرو ٹالرنس اپنائی گئی ہے۔ ضبط کی گئی گندم مارکیٹ میں لا کر قیمتوں کو کنٹرول کیا جائے گا۔آخر میں انہوں نے کہا کہ انتظامیہ کے ساتھ عوام کو مکمل تعاون کرنا چاہیے اور متاثرہ علاقوں میں انتظامیہ کی اجازت کے بغیر داخل نہ ہوں۔