انگلینڈ اور بھارت کی ویمنز کرکٹ ٹیموں کے درمیان پانچواں اور آخری ٹی ٹونٹی میچ (کل )کھیلاجائیگا

جمعہ 11 جولائی 2025 15:19

برمنگھم(اُردو پوائنٹ اخبارتازہ ترین - این این آئی۔ 11 جولائی2025ء)انگلینڈ اور بھارت کی ویمنز کرکٹ ٹیموں کے درمیان پانچ بین الاقوامی ٹی ٹونٹی میچوں پر مشتمل سیریز کا پانچواں اور آخری میچ (کل) ہفتہ کوایجبسٹن، برمنگھم کے مقام پر کھیلاجائیگا۔بھارت کی ویمن ٹیم کو میزبان انگلینڈ کی ویمن ٹیم کے خلاف 5 میچوں کی سیریز میں 1-3کی فیصلہ کن برتری حاصل ہے۔

بھارتی خواتین ٹیم نے پہلے ٹی ٹونٹی میچ میں برطانوی خواتین ٹیم کو 97 رنز سے ، دوسرے ٹی ٹونٹی میچ میں 24 رنز سے شکست دی تھی تاہم تیسرے ٹی ٹونٹی میچ میں میزبان انگلینڈ کی خواتین ٹیم نے بھارتی ویمنز کو 5 رنز سے مات دی تھی جس کے بعد چوتھے ٹی ٹونٹی میچ میں بھارتی ویمن نے انگلینڈ کی ویمن ٹیم کو نہ صرف 6 وکٹوں سے شکست دی بلکہ پانچ میچوں کی سیریز میں 1-3 کی فیصلہ کن برتری بھی حاصل کرلی۔

(جاری ہے)

انگلینڈ اینڈ ویلز کرکٹ بورڈ (ای سی بی) کے مطابق بھارت کی ویمن کرکٹ ٹیم اپنے دورہ انگلینڈ کے دوران میزبان ویمنز ٹیم کے خلاف 5ٹی ٹوٹی اور 3ایک روزہ بین الاقوامی میچوں کی سیریز کھیلے گی۔ٹی ٹونٹی سیریز کے چار میچ کھیلے جا چکے ہیں۔جن میں بھارت کی ویمن ٹیم کو میزبان ٹیم کے خلاف 1-3 کی واضع برتری حاصل ہے۔ٹی ٹونٹی سیریز میں بھارتی ٹیم کو ہرمن پریت کور لیڈ کریں گی جبکہ میزبان برطانوی ویمنز ٹیم کو بائولنگ آل رائونڈر نیٹ سکیور برنٹ لیڈ کریں گی۔

دونوں ٹیموں کے درمیان پانچ ٹی ٹونٹی میچوں کی سیریز کا پانچوں اور آخری ٹی ٹونٹی میچ ہفتہ کو ایجبسٹن، برمنگھم میں کھیلا جائے گا۔ پانچ ٹی ٹونٹی میچوں کی سیریز کے مکمل ہونے کے بعددونوں ٹیموں کے درمیان تین ایک روزہ میچوں کی سیریز کا پہلا میچ 16 جولائی کو روز بائول،سائوتھمپٹن میں کھیلاجائے گا، دوسرا ایک روزہ میچ 19 جولائی کو لارڈز ، لندن میں کھیلا جائے گاجبکہ تیسرا اور آخری میچ 22 جولائی کو ریور سائیڈ گراؤنڈ، چیسٹر لی سٹریٹ کھیلا جائے گا۔