آبادی میں توازن کے بغیر پائیدار ترقی ممکن نہیں، یوسف رضا گیلانی

جمعہ 11 جولائی 2025 19:31

اسلام آباد (اُردو پوائنٹ اخبارتازہ ترین - آن لائن۔ 11 جولائی2025ء) چیئرمین سینیٹ سید یوسف رضا گیلانی نے کہا ہے کہ تیزی سے بڑھتی آبادی ملکی وسائل، ترقی اور ماحولیات پر شدید دباؤ ڈال رہی ہے، جس پر قابو پانے کے لیے قومی سطح پر مشترکہ حکمت عملی کی اشد ضرورت ہے۔

(جاری ہے)

عالمی یوم آبادی کے موقع پر اپنے پیغام میں انہوں نے خبردار کیا کہ آبادی کے دباؤ کے باعث غربت، بے روزگاری اور ماحولیاتی چیلنجز شدت اختیار کر رہے ہیں، اور آئندہ نسلوں کو بنیادی سہولیات کی فراہمی دشوار ہو سکتی ہے۔

چیئرمین سینیٹ نے اس عزم کا اظہار کیا کہ پارلیمان اس اہم مسئلے کے حل کے لیے قانون سازی میں مؤثر کردار ادا کرے گا، اور مذہبی رہنماؤں، حکومت، میڈیا اور سول سوسائٹی کو ایک صفحے پر لانے کی ضرورت پر زور دیا۔