Live Updates

تعلیمی ادارے کل سے کھلیں گے یا نہیں؟ نوٹیفکیشن جاری کردیا گیا

صوبے میں سیلاب کے باعث انتظامیہ نے پنجاب یونیورسٹی میں کلاسز کا آغاز ایک ہفتے کے لیے ملتوی کر دیا

ساجد علی اتوار 31 اگست 2025 14:31

لاہور ( اُردو پوائنٹ اخبارتازہ ترین۔ 31 اگست 2025ء ) پنجاب میں گرمیوں کی تعطیلات کے بعد تعلیمی ادارے کل سے کھلیں گے یا نہیں؟ نوٹیفکیشن جاری کردیا گیا۔ تفصیلات کے مطابق ڈپنی کمشنر لاہور نے صوبائی دارالحکومت میں تعلیمی سرگرمیوں کے آغاز کا اعلان کیا ہے، ان کی جانب سے تعلیمی سرگرمیوں کی بحالی کا نوٹیفکیشن بھی جاری کردیا گیا، جس میں ضلعی انتظامیہ نے کہا ہے کہ شہر لاہور کے 45 سکولز کے علاوہ دیگر تمام سکولوں میں تعلیمی سرگرمیاں یکم ستمبر سے شروع ہوں گی جب کہ سیلاب سے متاثرہ علاقوں میں ریلیف کیمپس قائم کیے جانے کے باعث لاہور کے 45 سکولز میں تعلیمی سرگرمیوں کا آغاز صورتحال بہتر ہونے پر کیا جائے گا۔

نوٹیفکیشن میں کہا گیا ہے کہ مانگا منڈی، چوہنگ، سگیاں کے سرکاری سکولز بند رہیں گے، والدین اور طلباء سکولوں کی انتظامیہ سے رابطے میں رہیں، اس کے علاوہ شاہدرہ، بند روڈ، ٹھوکر نیاز بیگ کے سکول بھی بند رہیں گے، شاہ پور کانجراں، رنگیل پور، موہلنوال کے سکول بھی فی الحال نہ کھولنے کا فیصلہ کیا گیا ہے۔

(جاری ہے)

بتایا جارہا ہے کہ دریائے ستلج میں سیلابی صورتحال کے باعث بہاولنگر میں تعلیمی ادارے بند کرنے کا اعلامیہ جاری کیا گیا ہے، حکومت پنجاب کی ہدایت پر اسکول ایجوکیشن ڈیپارٹمنٹ کے جاری کردہ مراسلے میں کہا گیا کہ سرکاری و نجی سکول ، کالجز اور جامعات 5 ستمبر تک بند رہیں گے، اسی طرح اکیڈمیز اور ٹیوشن سینٹرز میں بھی سرگرمیاں معطل رہیں گی، تعلیمی ادارے بند کرنے کا فیصلہ دریائے راوی، چناب اور ستلج میں شدید سیلاب کے باعث کیا گیا ہے۔

دوسری طرف سیلاب کے باعث پنجاب یونیورسٹی میں کلاسز کا آغاز ایک ہفتے کے لیے ملتوی کر دیا گیا، رجسٹرار پنجاب یونیورسٹی کا نوٹیفکیشن میں کہنا ہے کہ موسم گرما کی تعطیلات کے بعد کلاسز کا آغاز ایک ہفتے کے لیے ملتوی کیا گیا ہے، پنجاب یونیورسٹی میں یکم تا 7 ستمبر زیرو ویک ہوگا، تاہم ہاسٹلز کی الاٹمنٹ کا سلسلہ جاری رہے گا اور کلاسز کا آغاز 8 ستمبر سے کردیا جائے گا۔