تاریخ کا سب سے بڑا سیلاب؛ پنجاب میں متاثرین کی تعداد 20 لاکھ تک جا پہنچی

لاہور ( اُردو پوائنٹ اخبارتازہ ترین۔ 31 اگست 2025ء ) پنجاب کو بارشوں اور بھارتی آبی جارحیت کے بعد تاریخ کے سب سے بڑے سیلاب کا سامنا ہے، جس کے باعث صوبے میں متاثرین کی تعداد 20 لاکھ تک جا پہنچی۔ اس حوالے سے ڈی جی پی ڈی ایم اے عرفان علی کاٹھیا کا کہنا ہے کہ پنجاب کے تینوں دریاؤں میں تاریخ کا سب سے بڑا سیلاب ہے، سیلابی ریلے کے اطراف سے دیہات سے لوگوں کا انخلا جاری ہے، سیلاب سے اب تک 20 لاکھ آبادی متاثر ہوچکی ہے ، 2200 دیہات زیر آب آئے ہوئے ہیں ، ریسکیوا ٓپریشن میں ساڑھے 7 لاکھ افراد کو محفوظ مقام پر منتقل کیا گیا ہے۔

انہوں نے بتایا کہ دریائے ستلج میں قصور کے مقام پر پانی کی سطح کم ہوئی ہے، ہیڈسلیمانکی پر پانی بڑھ رہا ہے، شام تک اس میں مزید اضافہ ہو نے کا خدشہ ہے، 2 ستمبر کو ستلج اور چناب کا پانی مل جائے گا، تریموں بیراج پر پانی کا بہاؤ 3 لاکھ 61 ہزار 633 کیوسک ہو چکا ہے، کل تک راوی اور چناب کا پانی ہیڈ محمد والہ اور ملتان کو ٹچ کرے گا ، ہیڈ محمد والہ اور شیرشاہ بریج پر مشکل آ سکتی ہے، سب سے پہلے آبادیوں اور لوگوں کی جان بچانا ہے۔

(جاری ہے)

بتایا گیا ہے کہ ملک میں مون سون کا نیا سپیل آگیا جس کے باعث لاہور سمیت مختلف علاقوں میں موسلا دھار بارش ہوئی، لاہور کے مختلف علاقوں میں وقفے وقفے سے بارش ہوئی، اس دوران لاہور کے علاقے کاہنہ میں آسمانی بجلی گرنے سے 2 افراد دم توڑ گئے، فیروزوالہ میں مکان کی چھت گرنے سے خاتون جاں بحق ہوگئی اور 3 افراد زخمی ہوئے جب کہ فیصل آباد، نارووال، فیروز والا، بہاولنگر سمیت صوبہ پنجاب کے دیگر علاقوں میں بھی بادل جم کر برسے۔

معلوم ہوا ہے کہ بارش کی وجہ سے نشیبی علاقوں میں پانی جمع ہوگیا اور کئی علاقوں میں فیڈرز ٹرپ ہونے سے بجلی کی فراہمی معطل ہوگئی، اسی طرح ملکہ کوہسار مری میں بھی وقفے وقفے سے موسلادھار بارش ہوئی، آزاد کشمیر کے مختلف علاقوں میں بھی بادل برس پڑے، میر پور اور باغ میں تیز بارش ہوئی، ندی نالوں میں طغیانی کا خطرہ بڑھ گیا، ایبٹ آباد سمیت خیبرپختونخواہ کے کئی علاقوں مین بھی موسلا دھار بارش ہوئی۔

بتایا جارہا ہے کہ نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں موسلادھار بارشوں کا الرٹ جاری کیا، ممکنہ شدید بارشوں کے باعث نشیبی علاقوں میں سیلاب اور پہاڑی علاقوں میں لینڈ سلائیڈنگ کا خدشہ ظاہر کردیا گیا، محکمہ موسمیات کا کہنا تھا کہ اسلام آباد میں ہفتے سے منگل تک گرج چمک کے ساتھ بارش ہوگی، پنجاب کے شمالی اور شمال مشرقی اضلاع بشمول لاہور اور سیالکوٹ میں اتوار اور پیر کو برسات کا امکان ہے، وسطی اور جنوبی پنجاب میں بھی آئندہ چند روز بارشوں کی پیشگوئی ہے۔