لیسکو اورسی آئی ایس این آرکے درمیان بجلی کی تقسیم کے نیٹ ورک کو ڈیجیٹائز کرنےکے حوالے سے معاہدے

جمعہ 11 جولائی 2025 22:32

لاہور (اُردو پوائنٹ اخبارتازہ ترین - اے پی پی۔ 11 جولائی2025ء) لاہور الیکٹرک سپلائی کمپنی (لیسکو) اور سینٹر فار انٹیلیجنٹ سسٹمز اینڈ نیٹ ورکس ریسرچ (سی آئی ایس این آر) کے درمیان بجلی کی تقسیم کے نیٹ ورک کو ڈیجیٹائز کرنے اور کاربن کے اخراج میں کمی کے حوالے سے ایک اہم معاہدے پر دستخط کیے گئے۔ ترجمان کے مطابق اس منصوبے کی گرانٹ جرمن حکومت نے جی آئی زیڈ کے پلیٹ فارم سے فراہم کی ہے، معاہدے کی تکمیل سے لیسکو کو ڈسٹری بیوشن نیٹ ورک کی ڈیجیٹائزیشن، ترسیلی نقصانات میں کمی، بجلی کے معیار میں بہتری اور نیٹ ورک میں شمسی توانائی کے موثر استعمال جیسے اہم فوائد حاصل ہوں گے۔

اس سلسلہ میں منعقدہ تقریب میں لیسکو کی جانب سے بورڈ ممبر طاہر بشارت چیمہ، چیف ایگزیکٹو انجینئر محمد رمضان بٹ ، ڈی جی میراڈ چوہدری محمد حسین، منیجر پلاننگ اینڈ فورکاسٹنگ ارقم الیاس، ڈپٹی منیجر ڈیمانڈ فورکاسٹنگ عمار یوسف کھرل، ڈپٹی منیجر لیگل محمد احمد یوسف اور ڈپٹی منیجر ٹرانسمیشن پلاننگ مظہر حسنین نے شرکت کی جبکہ CISNR اور GIZ کی نمائندگی پروجیکٹ جی آئی زیڈ کے سربراہ جینس برنک مین (جرمنی)، وائس چانسلر یو ای ٹی مردان و سوات ڈاکٹر محمد گل اور سید فیضان علی شاہ نے کی، جن کے ہمراہ تکنیکی ٹیم کے دیگر ارکان بھی موجود تھے۔

(جاری ہے)

اس موقع پر سی ای او لیسکو انجینئر محمد رمضان بٹ نے کہا کہ یہ معاہدہ توانائی کے شعبے میں ایک انقلابی قدم ہے جو نہ صرف لیسکو نیٹ ورک کو جدید خطوط پر استوار کرے گا بلکہ ماحول دوست ٹیکنالوجی کو فروغ دینے میں بھی مددگار ثابت ہوگا۔انہوں نے کہاکہ یہ معاہدہ ایک اہم قدم ہے جو ادارے کو عالمی معیار کی جانب لے جانے میں کلیدی کردار ادا کرے گا۔