اصلی ایس پی نے بھکر میں نقلی ایس پی کو گرفتار کرا دیا، پولیس یونیفارم اور وائرلیس سیٹ بھی برآمد

ملزم نے فیصل آباد میں اپنا جعلی دفتر قائم کر رکھا تھا، جہاں پرائیویٹ گن مین، ہوٹر لگی گاڑی استعمال کرتا تھا

ہفتہ 12 جولائی 2025 15:41

بھکر(اُردو پوائنٹ اخبارتازہ ترین - این این آئی۔ 12 جولائی2025ء)''بکرے کی ماں کب تک خیر منائے گی'' یہ کہاوت اُس وقت سچ ثابت ہوئی جب بھکر میں ایک جعلی ایس پی کو اصل ایس پی شوکت علی نے گرفتار کرا دیا۔ خود کو پولیس آفیسر ظاہر کر کے لوٹ مار اور دھوکا دہی کرنے والا ملزم ارباز آخر کار قانون کی گرفت میں آ گیا۔تفصیلات کے مطابق سرائے مہاجر تھانے کی پولیس نے کارروائی کرتے ہوئے جعلی ایس پی کو حراست میں لیا۔

ملزم کے قبضے سے پولیس یونیفارم، چھڑی، ٹوپی، اور وائرلیس سیٹ بھی برآمد کیا گیا۔ ایس پی بھکر شوکت علی کے مطابق ارباز نہ صرف عام شہریوں بلکہ مختلف محکموں کو بھی بلیک میل کرتا رہا ہے۔ایس پی کا کہنا تھا کہ ملزم نے فیصل آباد میں اپنا جعلی دفتر قائم کر رکھا تھا، جہاں پرائیویٹ گن مین، ہوٹر لگی گاڑی اور پولیس آفیسر کی طرز پر پروٹوکول استعمال کرتا تھا۔

(جاری ہے)

اس پر پنجاب کے مختلف اضلاع میں کم از کم 14 مقدمات درج ہیں، جن میں جعلسازی، دھوکا دہی اور فراڈ شامل ہیں۔پولیس حکام کے مطابق ملزم ارباز سادہ لوح افراد کو جھانسہ دے کر پیسے بٹورتا تھا اور خود کو ایس پی ظاہر کر کے اثرورسوخ جتاتا تھا۔ وہ سوشل میڈیا پر بھی جعلی پولیس آفیسر کے طور پر سرگرم تھا۔ملزم کو چار روزہ جسمانی ریمانڈ پر پولیس کے حوالے کر دیا گیا جبکہ مزید تحقیقات جاری ہیں۔ گرفتار ہونے پر ملزم ارباز نے کہا، ''غلطی ہو گئی، معاف کر دیا جائی''، تاہم پولیس کا مؤقف ہے کہ قانون سے کھیلنے والوں کو معافی نہیں دی جا سکتی۔