معروف براڈ کاسٹر، مصنف و ہدایت کار آغا ناصر کی برسی ہفتے کو منائی گئی

ہفتہ 12 جولائی 2025 15:43

اسلام آباد (اُردو پوائنٹ اخبارتازہ ترین - اے پی پی۔ 12 جولائی2025ء) معروف براڈ کاسٹر، مصنف و ہدایت کار آغا ناصر کی برسی ہفتہ 12 جولائی کو منائی گئی ۔ وہ 9 فروری 1937ء میں میرٹھ کے قصبے فریدنگر میں پیدا ہوئے۔ بی اے کا امتحان سندھ مسلم کالج سے پاس کیا اور تاریخ میں ایم اے کی ڈگری جامعہ کراچی سے حاصل کی۔ انھوں نے اپنے کریئر کا آغاز 1955ء میں ریڈیو پاکستان میں بحیثیت براڈکاسٹر کیا اور بعد ازاں وہ ادارے کے ڈائریکٹر جنرل کے عہدے پر بھی فائز رہے۔

1964ء میں وہ پی ٹی وی سے منسلک ہو گئے اور یہاں بطور ہدایتکار اور پروڈیوسر خدمات سر انجام دیں۔ آغا ناصر نے کچھ عرصے کے لیے پی ٹی وی کے منیجنگ ڈائریکٹر کے طور پر بھی فرائض سرانجام دیے۔ آغا ناصر کی ایک تخلیق ’تعلیم بالغاں ‘ کو پی ٹی وی پر نشر کیے جانے والے بہترین ڈراموں میں شمار کیا جاتا ہے۔

(جاری ہے)

انھوں نے کئی فلموں میں ہدایت کاری بھی کی جن میں وحید مراد اور طلت اقبال جیسے اداکاروں نے کام کیا تھا۔

آغا ناصر ایک اچھے مصنف بھی تھے۔ انھوں نے کل چھ کتب بھی تحریر کیں اور ان کی ثقافت پر تحریروں کو کافی پسند کیا گیا۔ ان کی خودنوشت سوانح آغا سے آغا ناصر تک پورب اکیڈمی اسلام آباد سے شائع ہو چکی ہے۔آغا ناصر نے ریڈیو پاکستان میں ’’اسٹوڈیو نمبر 9‘‘اور’’حامد میاں کے یہاں ‘‘جب کہ پاکستان ٹیلی وژن میں الف نون ،تعلیم بالغان جیسے شاہکار ڈرامے تخلیق کئے۔

ان کے کیریئر میں 1970ء کے عام انتخابات کی براہ راست نشریات بھی اہم سنگ میل کی حیثیت رکھتی ہیں۔ ریٹائرمنٹ کے بعد وہ ایک نجی ٹی وی چینل سے بھی منسلک رہے۔ ان کی خدمات کے اعتراف میں انہیں صدارتی تمغہ برائے حسنِ کارکردگی سے بھی نوازا گیا۔ آغا ناصر 12 جولائی 2016 کو انتقال کر گئے۔ ان کی برسی کے موقع پر علمی و ادبی حلقوں اور شو بز انڈسٹری کے زیر انتظام منعقدہ تقریبات میں آغا ناصر کی خدمات پر خراج تحسین پیش کیا گیا۔