پاکستان بیت المال کے زیرِ اہتمام آن لائن تربیتی سیشن کاانعقاد

ہفتہ 12 جولائی 2025 18:06

سرگودھا (اُردو پوائنٹ اخبارتازہ ترین - اے پی پی۔ 12 جولائی2025ء) پاکستان بیت المال کے ریجنل آفس لاہور نے منیجنگ ڈائریکٹر کی ہدایات آن لائن تربیتی سیشن کاانعقاد کیا ۔ آن لائن منعقد ہونے والا سیشن ڈائریکٹر ریجنل آفس لاہور محمد ظہیر کی زیرصدارت ہواجنہوں نے بطور ماسٹر ٹرینر فرائض سرانجام دیے۔ تربیتی سیشن کا بنیادی مقصد نظام کی موثریت میں اضافہ اورعملے کی پیشہ وارانہ صلاحیتوں کو بہتر بنانا تھا۔

اس موقع پر تین اہم موضوعات پر تفصیلی روشنی ڈالی گئی جن میں وہسل بلوئنگ، مفادات کا ٹکرائو اور تنظیمی رویہ شامل تھے۔ یہ خصوصی سیشن دیانت داری، شفافیت، اور تنظیمی اخلاقیات کے فروغ کیلئے ڈیزائن کیا گیا تھا تاکہ پاکستان بیت المال کی موثراور جواب دہ عوامی خدمت کے مشن کو مزید مضبوط بنایا جا سکے۔

(جاری ہے)

پاکستان بیت المال سرگودھا کے افسران و سٹاف نے اس آن لائن تربیتی سیشن میں بھرپور حصہ لیا اور روزمرہ کے کاروباری امور سے متعلق عملی مثالوں اور بصیرت سے استفادہ کیا۔

تربیت کے اختتام پر سوال و جواب کا سیشن بھی منعقد ہواجس میں شرکاء کو ماسٹر ٹرینر سے براہ راست بات چیت، تصورات کی وضاحت اور اپنی رائے کااظہارکرنے کا موقع ملا۔اس انٹرایکٹو حصے نے تربیت کی افادیت میں نمایاں اضافہ کیا اور تنظیم کے اندر کھلے مکالمے کو فروغ دیا۔ ریجنل آفس نے منیجنگ ڈائریکٹر کی وڑنری قیادت میں ادارہ جاتی کارکردگی اور نظم و نسق کے معیار کو مزید بلند کرنے کیلئے ایسے تربیتی اقدامات کو جاری رکھنے کاعزم ظاہرکیا۔