جعلی زرعی ادویات کی فیکٹری پکڑی گئی، کارروائی کامیاب

جعلی زرعی ادویات اور ڈی اے پی کھاد بنائی جاتی تھی، کسان بڑی تباہی سے بچ گئے

ہفتہ 12 جولائی 2025 18:59

حجرہ شاہ مقیم (اُردو پوائنٹ اخبارتازہ ترین - آن لائن۔ 12 جولائی2025ء) پولیس اور محکمہ زراعت نے تھانہ سٹی کے علاقہ پراچہ بستی میں مشترکہ کارروائی کرتے ہوئے جعلی زرعی ادویات اور ڈی اے پی کھاد بنانے والی فیکٹری کو پکڑ لیا۔ کارروائی کے دوران انکشاف ہوا کہ ملزم مختلف کمپنیوں کے لیبل لگا کر جعلی زرعی ادویات تیار کرتا تھا اور انہیں دیپالپور، قصور اور پاکپتن کے اضلاع میں کسانوں کو فروخت کرتا تھا۔

(جاری ہے)

فیکٹری سے لاکھوں روپے مالیت کا جعلی مواد بھی برآمد کر لیا گیا۔ سیکیورٹی برانچ کے فیلڈ آفیسر نے کہا کہ کسان ملکی معیشت میں ریڑھ کی ہڈی کی حیثیت رکھتے ہیں اور ان کا استحصال کسی صورت برداشت نہیں کیا جائے گا۔ کسان دشمن عناصر کے خلاف آہنی ہاتھوں سے نمٹا جائے گا۔ علاقائی کسان تنظیموں نے بروقت کارروائی پر سیکیورٹی و اسپیشل برانچ کو خراجِ تحسین پیش کیا ہے۔ سٹی پولیس نے قانونی کارروائی کا آغاز کر دیا ہے جبکہ مزید تفتیش جاری ہے۔