اسلام آباد (اُردو پوائنٹ اخبارتازہ ترین - اے پی پی۔ 12 جولائی2025ء) چیئرمین سی ڈی اے و چیف کمشنر اسلام آباد محمد علی رندھاوا نے ممبر انوائرمنٹ اسفندیار بلوچ، باکو ٹیم کے آرکیٹیکٹ و ہارٹیکلچر ماہرین ، ڈی جی انوائرمنٹ اور متعلقہ افسران کے ہمراہ پارک روڈ پر قائم سی ڈی اے ماڈل نرسری، سید پور ویلج اور میلوڈی فوڈ اسٹریٹ کا دورہ کیا۔ہفتہ کو سی ڈی اے کی جانب سے جاری بیان کے مطابق باکو ٹیم کے آرکیٹیکٹ و ہارٹیکلچر ماہرین نے چیئرمین سی ڈی اے کو، سی ڈی اے ماڈل نرسری کی اپ گریڈیشن، بحالی اور اسے گارڈینیا حب میں تبدیل کرنے سمیت سید پور ویلج اور میلوڈی فوڈ اسٹریٹ منصوبے کے تحت ہونے والے اب تک کے کاموں پر پیش رفت کے بارے میں تفصیلی بریفنگ دی۔
چیئرمین سی ڈی اے کو بریفنگ دیتے ہوئے بتایا گیا کہ سی ڈی اے ماڈل نرسری کو گارڈینیا حب میں تبدیل کرنے کیلئے تیزی سے کام جاری ہے جس میں باکو کے آرکیٹکٹس اور ہارٹیکلچر ماہرین خصوصی طور پر معاونت فراہم کررہے ہیں، سی ڈی اے ماڈل نرسری میں فلاور شاپس سمیت ٹریننگ و ریسرچ سینٹر کی سہولیات بھی شامل ہونگی۔
(جاری ہے)
نرسری میں منفرد اور جدید طرز کے کنٹرولڈ وینٹیلیٹڈ گرین ہاؤسز تعمیر کئے گئے ہیں جو نہ صرف پودوں کی نشوونما کیلئے بہترین ماحول فراہم کریں گے بلکہ تحقیق و ترقی کیلئے بھی معاون ثابت ہوں گے۔
سی ڈی اے ماڈل نرسری میں جدید ٹشو کلچر سینٹر بھی قائم کیا جائے گا جہاں پودوں کی نئی اقسام کو پروپیگیشن کے جدید طریقوں سے تیار کیا جاسکے گا۔اس موقع پر چیئرمین سی ڈی اے نے کہا کہ ماڈل نرسری کو بین الاقوامی معیار کے مطابق اسٹیٹ آف دی آرٹ نرسری کے طور پر بنایا جارہا ہے۔ انہوں نے کہا کہ سی ڈی اے ماڈل نرسری میں کام کرنے والے تمام ملازمین کو سی ڈی اے ماڈل نرسری کی دیکھ بھال اور حفاظت کیلئے خصوصی ٹریننگ فراہم کی جائے گی تاکہ وہ اپنے فرائض منصبی مزید مستعدی اور جانفشانی سے سر انجام دے سکیں۔
چیئرمین سی ڈی اے نے نرسری میں ہونے والے ترقیاتی کاموں ، فلاور شاپس اور اسے گارڈینیا حب میں تبدیل کرنے کے منصوبہ پر باکو ٹیم کے آرکیٹیکٹ و ہارٹیکلچر ماہرین کے کام کو سراہا۔ انہوں نے یہ امید ظاہر کی کہ سی ڈی اے ماڈل نرسری مستقبل میں اسلام آباد کے شہریوں کی ہارٹیکلچر ضروریات کو پوری کرنے میں معاون ثابت ہوگی۔چیئرمین سی ڈی اے نے کہا کہ سی ڈی اے نرسری کی اپ گریڈیشن کا بنیادی مقصد اسلام آباد کو ہارٹیکلچر کے شعبے میں ایک اہم مرکز کے طور پر متعارف کروانا ہے۔
انہوں نے کہا کہ جدید اور خوبصورت فلاور شاپس کی تعمیر کے کام کو تیزی سے مکمل کیا جائے، جس سے نہ صرف شہر کی خوبصورتی میں اضافہ ہوگا بلکہ یہ شہریوں کیلئے ایک پرکشش تفریحی مقام بھی بنے گا، نرسری میں رنگ برنگے پھولوں کی نمائش کیلئے خصوصی جگہ مختص کی جائے، جہاں موسمی اور غیر موسمی پھولوں کی خوبصورت اقسام کو عوام کیلئے پیش کیا جاسکے گا۔
اس کے علاوہ ایک ایپ بھی بنائی جائے جس کے ذریعے شہری کیش لیس ڈیجیٹل ان لائن ادائیگی کرکے اپنی پسند کے پودے گھر بیٹھے خرید سکیں گے۔انہوں نے مزید کہا کہ اس منصوبے کا جامع ڈیزائن سی ڈی اے کے اس عزم کی عکاسی کرتا ہے کہ وہ اسلام آباد میں گرین ایریاز کو مزید بہتر بنانے کے ساتھ ساتھ ماحولیاتی پائیداری کے کلچر کو فروغ دے گا۔چیئرمین سی ڈی اے نے کہا کہ نرسری کو گارڈینیا حب کے طور پر تشکیل دینا اسلام آباد کو مزید خوبصورت اور سرسبز و شاداب دارالحکومت بنانے کی جانب ایک اہم قدم ہے۔
انہوں نے سی ڈی اے کی ماڈل نرسری کو عالمی معیارات کے مطابق ایک اسٹیٹ آف دی آرٹ ماڈل نرسری میں تبدیل کرنے کیلئے تمام دستیاب وسائل کو بروئے کار لانے کی ہدایت کی۔ انہوں نے کہا کہ اس منصوبے سے نہ صرف شہر کی خوبصورتی میں اضافہ ہوگا بلکہ یہ ہارٹیکلچر کے شعبے میں روزگار کے نئے مواقع بھی پیدا کرے گا۔مزید برآں چیئرمین سی ڈی اے نے محمد علی رندھاوا نے سید پور ماڈل ویلج کا دورہ کیا اور وہاں جاری اپ لفٹنگ اور تزئین و آرائش کے حوالے سے کاموں کا جائزہ لیا۔
انہوں نے کہا کہ اس منصوبہ سے سید پور ویلج ایک بہترین سیاحتی مقام بن جائے گا اور یہاں سیاحوں کے لئے بہترین انتظامات اور تفریحی سہولیات کو یقینی بنایا جائے گا۔ اس موقع پر چیئرمین سی ڈی اے نے سید پور ویلج کی اپ لفٹنگ اور تزئین و آرائش کے کاموں کو جلد از جلد مکمل کرنے کی ہدایت دی۔ انہوں نے کہا کہ سید پور ویلج کو بہترین سیاحتی و تفریح مقام بنانے کے حوالے سے تمام وسائل بروئے کار لائے جائیں۔
بعد ازاں چیئرمین سی ڈی اے و چیف کمشنر اسلام آباد محمد علی رندھاوا نے میلوڈی فوڈ اسٹریٹ کا بھی دوہ کیا اور وہاں جاری اپ لفٹنگ سرگرمیوں کا بھی تفصیلی جائزہ لیا۔ انہوں نے ہدایت کی کہ میلوڈی فوڈ اسٹریٹ کی اپ لفٹنگ اور دیگر تزئین و آرائش سمیت مرمتی کاموں کو جلد از جلد پایہ تکمیل تک پہنچایا جائے تاکہ میلوڈی فوڈ اسٹریٹ آنے والے شہریوں کو ہرممکن سہولیات فراہم کی جاسکیں۔
اس موقع پر چیئرمین سی ڈی اے نے کہا کہ سی ڈی اے ماڈل نرسری کا گارڈینیا حب کا منصوبہ ، سید پور ویلج اور میلوڈی فوڈ اسٹریٹ کی اپ لفٹنگ و تزئین و آرائش جیسے اقدامات اسلام آباد کے شہریوں کو صاف ستھرا اور سرسبز ماحول اور بہترین سیاحتی و تفریح سہولیات کی فراہم کو یقینی بنانے کی سی ڈی اے کی کاوشوں کا ایک اہم حصہ ہے۔ انہوں نے اس عزم کا اعادہ کیا کہ سی ڈی اے اسلام آباد کو ایک جدید، خوبصورت، سیاحتی اور ماحول دوست مثالی شہر بنانے کیلئے اپنی تمام کاوشیں جاری رکھے گا۔
