اسلام آباد میں ٹریفک قوانین کے نفاذ اور چالان کیلئے ڈرون ٹیکنالوجی کا استعمال شروع

حالیہ آپریشنز کے دوران 300 سے زائد ڈرائیوروں کو جرمانے اور 350 سے زائد شہریوں کو رہنمائی بھی فراہم کی گئی

ساجد علی اتوار 13 جولائی 2025 14:30

اسلام آباد ( اُردو پوائنٹ اخبارتازہ ترین۔ 13 جولائی 2025ء ) وفاقی دارالحکومت اسلام آباد میں ٹریفک قوانین کے نفاذ اور چالان کیلئے ڈرون ٹیکنالوجی کا استعمال شروع کردیا گیا۔ تفصیلات کے مطابق اسلام آباد ٹریفک پولیس (آئی ٹی پی) نے ایکسپریس وے اور سری نگر ہائی وے سمیت دیگر اہم شاہراہوں پر ٹریفک کی خلاف ورزیوں پر نظر رکھنے کے لیے ڈرون ٹیکنالوجی کے استعمال کا آغاز کردیا ہے، اس حوالے سے حالیہ آپریشنز کے دوران 300 سے زائد ڈرائیوروں کو جرمانے اور 350 سے زائد شہریوں کو رہنمائی بھی فراہم کی گئی۔

آئی ٹی پی حکام کا کہنا ہے کہ چیف ٹریفک آفیسر کیپٹن ریٹائرڈ سید ذیشان حیدر کی قیادت میں اس اقدام کا مقصد ریئل ٹائم مانیٹرنگ کے ذریعے ٹریفک قوانین پر سختی سے عمل درآمد کو یقینی بنانا ہے، ڈرونز کو لین ڈسپلن کی خلاف ورزیوں، اوور لوڈنگ، ون وہیلنگ اور ڈرائیونگ کے دیگر خطرناک رویوں کی نشاندہی کرنے کے لیے استعمال کیا جا رہا ہے۔

(جاری ہے)

انہوں نے مزید بتایا کہ ڈرون کیمروں کے ذریعے حاصل کی گئی فوٹیج کی بنیاد پر قانونی کارروائی کے ذریعے 300 سے زائد ڈرائیوروں کو پہلے ہی جرمانہ کیا جا چکا ہے، آگاہی مہم کے ایک حصے کے طور پر 350 سے زائد شہریوں کو ٹریفک قوانین کے بارے میں آگاہی بھی دی گئی ہے اس کے علاوہ سنگین خلاف ورزیوں میں ملوث متعدد گاڑیوں کو بھی مقامی تھانوں میں بند کر دیا گیا ہے۔