برآمدات کے فروغ کے لیے برطانیہ کے ساتھ تجارتی تعلقات میں اضافہ انتہائی ضروری ہے، میاںکاشف اشفاق

اتوار 13 جولائی 2025 15:00

لاہور (اُردو پوائنٹ اخبارتازہ ترین - اے پی پی۔ 13 جولائی2025ء) پاک برطانیہ جوائنٹ بزنس کونسل کے چیئرمین اور پاکستان فرنیچر کونسل کے سی ای او میاں کاشف اشفاق نے کہا ہے کہ پاکستان کی سماجی و اقتصادی خوشحالی، جدید صنعت کاری اور برآمدات کے مطلوبہ اہداف کے حصول کے لیے برطانیہ کے ساتھ تجارتی تعلقات میں اضافہ انتہائی ضروری ہے اور پاکستانی سرمایہ کار اس میں اہم کردار ادا کر سکتے ہیں۔

اتوار کو صدر پاک برٹش فرینڈ شپ کونسل نارتھ ویسٹ چیپٹر یو کے محمد ارباب خان کی قیادت میں پاکستانی نژاد برطانوی تاجروں اور سرمایہ کاروں سے گفتگو کرتے ہوئے انہوں نے کہا کہ مالی سال 24 میں دونوں ممالک کی باہمی برآمدات 2,014,768 ڈالر اور درآمدات 781,996 ڈالر رہیں۔ بامعنی اصلاحات، رعایتوں، بہتر پالیسیوں اور پیداواری چینلز کے ذریعے ان تعلقات کو مزید مضبوط کیا جا سکتا ہے۔

(جاری ہے)

دونوں طرف ٹریڈ ہائوسز کی تعمیر، ترجیحی وآزادانہ تجارتی معاہدوں، چیمبرز کے وفود کے تبادلے، نمائشوں کے باقاعدہ انعقاد، مصنوعات کی معلومات کے تبادلے اور فیسٹیولز کا انعقاد بہت زیادہ مددگار ہو سکتا ہے۔ انہوں نے کہا کہ پاکستان میں برطانوی ہائی کمشنر جین میریٹ پاکستان کے ساتھ مالیات، صحت، تعلیم، انجینئرنگ اور توانائی سمیت اہم شعبوں میں اسٹریٹجک شراکت داری کو مزید مضبوط بنانے کے لیے پرعزم ہیں۔

میاں کاشف اشفاق نے کہا کہ پاکستان کے پالیسی ساز، تاجر، سرمایہ کار اور ماہرین دو طرفہ تعلقات کو مزید مستحکم کرنے، باہمی تعاون، مشاورت اور کنکٹویٹی کو بہتر بنانے میں کردار ادا کریں۔ برطانیہ اور یورپی یونین میں تعینات ٹریڈ اتاشیوں کے کردار کو بھی زیادہ تعمیری اور عملی بنانا ہو گا۔ انہوں نے کہا کہ پاکستانی نژاد برطانوی سیاستدانوں اور پالیسی سازوں کو بھی اس سلسلے میں زیادہ مثبت کردار ادا کرنا چاہیے۔