ورلڈ ماسٹرز اسنوکر: آصف اور شاہد نے میچز جیت لیے

پہلے میچ میں آصف نے اومان کے ہیثم بن علی کو 3-0 سے ہرایا، دوسرے میں آئر لینڈ کے جے چوپڑا کو مات دی

پیر 14 جولائی 2025 12:10

ورلڈ ماسٹرز اسنوکر: آصف اور شاہد نے میچز جیت لیے

منامہ (اُردو پوائنٹ اخبارتازہ ترین - این این آئی۔ 14 جولائی2025ء)اسنوکر چیمپئن شپ میں محمد آصف اور شاہد آفتاب نے میچز جیت لیے۔پاکستان کے محمد آصف اور شاہد آفتاب نے ورلڈ ماسٹرز اسنوکر چیمپئن شپ میں کامیاب آغاز کرتے ہوئے ایونٹ کے پہلے روز اپنے گروپ کے دونوں میچز جیت کر اگلے راؤنڈ تک اپنی رسائی یقینی کر لی۔بحرین میں ورلڈ ماسٹرز اسنوکر چیمپئن شپ میں 15 ملکوں کے 43 پلیئرز شریک ہیں، پاکستان کے محمد آصف اور شاہد آفتاب نے ایونٹ کے پہلے روز اپنے دونوں میچز جیت لیے۔

گروپ سی میں شامل پاکستان کے محمد آصف نے اپنے دونوں میچز بغیر کوئی فریم ڈراپ کیے جیتے، پہلے میچ میں انہوں نے اومان کے ہیثم بن علی کو 3-0 سے ہرایا، دوسرے میچ میں انہوں نے آئر لینڈ کے جے چوپڑا کو مات دی۔

(جاری ہے)

شاہد آفتاب کو دونوں میچز میں سخت مقابلے کا سامنا کرنا پڑا، بیسٹ آف فائیو کے دونوں میچز انہوں نے فیصلہ کن فریم میں جیتے۔دن کے پہلے میچ میں انہوں نے مصر کے محمد نویر کو اور دوسرے میچ میں کویت کے عبداللّٰہ الیوسف کو زیر کیا۔پاکستان کے دونوں پلیئرز آج اپنے آخری گروپ میچز میں بھارتی پلیئرز سے مقابلہ کریں گے۔ بحرین میں کھیلی جانے والی چیمپئن شپ میں آئی بی یس ایف ورلڈ ماسٹر، انڈر 17، انڈر 21 اور مینز سکس ریڈ اسنوکر میچز 24 جولائی تک کھیلے جائیں گے۔