ورلڈ پولیس گیمز 2025 میں تاریخ رقم کرنے والے باکسر علی نواز وطن واپس پہنچ گئے،ایئرپورٹ پر ان کا والہانہ استقبال

پیر 14 جولائی 2025 22:47

اسلام آباد (اُردو پوائنٹ اخبارتازہ ترین - آن لائن۔ 14 جولائی2025ء) ورلڈ پولیس گیمز 2025 (امریکہ) میں پاکستان پولیس کی تاریخ کا پہلا سلور میڈل جیتنے والے اسلام آباد پولیس کے نوجوان باکسر کانسٹیبل علی نواز وطن واپس پہنچ گئے۔ اسلام آباد انٹرنیشنل ایئرپورٹ پر ان کا والہانہ استقبال کیا گیا، جہاں پولیس افسران کی بڑی تعداد اور اعلیٰ افسران نے ان کی عالمی کامیابی کو خراجِ تحسین پیش کیا۔

ایئرپورٹ پر اے آئی جی لاجسٹکس عبد الحق عمرانی کی قیادت میں علی نواز کو پھولوں کے ہار پہنائے گئے اور ان کے اعزاز میں نعرے لگائے گئے۔ بعد ازاں، آئی جی اسلام آباد سید علی ناصر رضوی نے باکسر علی نواز کو اپنے دفتر میں مدعو کیا، جہاں انہیں نقد انعام اور اعزازی شیلڈ پیش کی گئی۔

(جاری ہے)

علی نواز، جو اسلام آباد پولیس میں بطور کانسٹیبل خدمات انجام دے رہے ہیں، نے ورلڈ پولیس گیمز میں شاندار کارکردگی دکھاتے ہوئے عالمی سطح پر نہ صرف پاکستان کا نام روشن کیا بلکہ اسلام آباد پولیس کے لیے بھی ایک تاریخی لمحہ رقم کیا۔

آئی جی اسلام آباد نے کہا کہ اسلام آباد پولیس کو اپنے بہادر اور باصلاحیت جوان پر فخر ہے۔ علی نواز نے عالمی سطح پر ہماری نمائندگی کر کے پوری فورس کے سر فخر سے بلند کر دیے۔ آئی جی نے مزید اعلان کیا کہ علی نواز کو مستقبل میں بھی بین الاقوامی مقابلوں میں شرکت کے لیے پوری سرکاری معاونت فراہم کی جائے گی۔ علی نواز کی یہ کامیابی نہ صرف پولیس فورس کے لیے باعثِ افتخار ہے بلکہ ملکی سطح پر نوجوان کھلاڑیوں کے لیے ایک روشن مثال بھی ہے۔ ان کی محنت، نظم و ضبط اور وطن سے محبت نے انہیں وہ مقام دلایا جو ہمیشہ یاد رکھا جائے گا۔