ایشیا کپ کے بعد جونیئر ہاکی ورلڈ کپ کیلئے بھی پاکستانی ٹیم بھارت نہ بھیجنے کا فیصلہ

ہاکی کے علاوہ بھی کسی ٹیم کو بھارت کی سرزمین پر کھیلنے کے لیے این او سی جاری نہیں ہوگا : ذرائع

ذیشان مہتاب منگل 15 جولائی 2025 10:44

لاہور (اردو پوائنٹ تازہ ترین اخبار ۔ 15 جولائی 2025ء ) پاکستانی ٹیم کی 28 نومبر سے بھارت میں شیڈول جونیئر ہاکی ورلڈ کپ میں عدم شرکت کا امکان ہے۔

انٹرنیشنل ہاکی فیڈریشن نے جونیئر ورلڈ کپ میں کوالیفائی کرنے والی ٹیموں کو مختلف پولز میں تقیسم کررکھا ہے جس میں پاکستان اور بھارت ایک ہی پول میں ہیں۔

ذرائع کے مطابق ایشیاء ہاکی کپ میں قومی ٹیم کو شرکت کیلئے این او سی نہ دینے کے حوالے سے پی ایچ ایف حکام کوآگاہ کیا جاچکا ہے۔

پی ایچ ایف حکام نے ایشین ہاکی فیڈریشن کو حکومتی اجازت سے مشروط کرتے ہوئے اپنی ٹیم کی دستیابی دی تھی۔

یہ بھی اطلاعات ہیں کہ ہاکی کے ساتھ دوسری کسی ٹیم کو بھی بھارت کی سرزمین پر ہونے والے ایونٹ کے لیے این او سی جاری نہیں ہوگا۔

(جاری ہے)

پاکستان کے بعض ہاکی اولمپئِنز نے بھی مطالبہ کر رکھا ہے کہ ایشیاء کپ کے ساتھ جونیئر ورلڈکپ کو بھی کسی نیوٹرل مقام پر منتقل کیا جائے۔

یاد رہے کہ اس سے قبل پاکستان نے سیکیورٹی خدشات کو دیکھتے ہوئے ایشیاء کپ کے لیے ہاکی ٹیم کو بھارت نہ بھیجنے کا فیصلہ کیا تھا۔

حکومتی ذرائع کے مطابق پاکستان نے ہمیشہ کھیلوں کو ملکی سیاستوں سے بالاتر رکھا ہے لیکن بھارت نے کھیلوں کو سیاست کی نظر کیا اور متنازعہ بنایا۔

بھارتی میڈیا پاکستان کے خلاف زہر اگل رہا ہے۔ انتہا پسند تنظیم آر ایس ایس مختلف سوشل میڈیا اکاؤنٹس سے پاکستان ہاکی ٹیم کو کھلم کھلا دھمکیاں دے رہی ہے۔

ذرائع کے مطابق موجودہ صورتحال، تعلقات کی کشیدگی اور ٹیم کو لاحق سیکیورٹی خدشات کو دیکھتے ہوئے کھلاڑیوں کو نہیں بھیجا جاسکتا۔