Live Updates

ملک بھر میں طوفانی بارشوں ،سیلاب سے تباہی، حادثات میں 14 افراد جاں بحق

پیر 14 جولائی 2025 20:10

اسلام آباد (اُردو پوائنٹ اخبارتازہ ترین - این این آئی۔ 14 جولائی2025ء)ملک کے مختلف علاقوں میں طوفانی بارشوں اور سیلاب نے تباہی مچادی، مختلف حادثات میں 14 افراد جاں بحق اور 14 زخمی ہوئے۔تفصیلات کے مطابق ملک کے مختلف اضلاع میں طوفانی بارشیں 14 جانیں لے گئیں، بارشوں سے حادثات میں 14 افراد زخمی بھی ہوئے۔خیبرپختونخوا میں 24 گھنٹوں کے دوران بارشوں سے حادثات میں بچوں سمیت 9 افراد جاں بحق ہوئے، کوہاٹ میں مکان کی چھت گرگئی، جس کے نتیجے میں ایک شخص جاں بحق ہوگیا۔

ملاکنڈ میں دیوار گرنے سے 2 بہنیں لقمہ اجل بنیں، جمرود میں 2 بچیاں سیلاب کی نذر ہوگئیں جبکہ لکی مروت میں 4 بچے جوہڑ میں ڈوب گئے۔عارف والا میں مکان کی چھت گرنے سے ایک شخص جاں بحق اور دوسرا زخمی ہوگیا، اوکاڑہ میں آسمانی بجلی گرنے سے لڑکا اور لڑکی جاں بحق اور ایک لڑکی زخمی ہوگئی جبکہ بہاولنگر میں مدرسے کی چھت گرگئی، ملبے تلے دب کر 2 بچے جاں بحق اور 12 زخمی ہوگئے۔

(جاری ہے)

کوہ سلیمان پر ندی نالے بپھر گئے، ریلے دریائے سندھ میں داخل ہوگئے، جس کے باعث کچے کی کئی بستیاں زیرآب آگئیں، رہائشیوں نے نقل مکانی شروع کردی جبکہ تربیلا اور منگلا ڈیم میں بھی پانی سطح بلند، ریلیف کیمپ قائم کردیے گئے۔بلوچستان میں موسلادھار بارش سے ندی نالوں میں طغیانی آگئی، کوہلو اور صحبت پور میں نشیبی علاقے زیرآب آگئے۔صادق آباد، کوٹ ادو، کمالیہ اور ساہیوال میں برسات سے نشیبی علاقے زیرآب آگئے جبکہ قصور، ڈی جی خان، راجن پور، تونسہ، شیخوپورہ، جیکب آباد، پاکپتن اور دیپالپور میں بارش سے سڑکیں تالاب میں تبدیل ہوگئیں۔اس کے علاوہ شرقپورشریف، صادق آباد، کمالیہ، ساہیوال، کوٹ ادو میں بھی نظام زندگی درہم برہم ہوگیا۔