ؒبے گناہ پنجابی مسافروں کو ان کی زبان اور شناخت کی بنیاد پر چن چن کر قتل کرنا انسانیت کے خلاف جرم ہے، ماہ جبین شیران

پیر 14 جولائی 2025 20:50

ق*کوئٹہ (اُردو پوائنٹ اخبارتازہ ترین - آن لائن۔ 14 جولائی2025ء) سابق رکن بلوچستان اسمبلی اور معروف سماجی و سیاسی رہنما ماہ جبین شیران نے مکہ مکرمہ سے جاری اپنے ایک بیان میں بلوچستان کے ضلع ژوب میں سرڈھاکہ کے مقام پر بے گناہ مسافروں کے قتل کی شدید الفاظ میں مذمت کرتے ہوئے کہا ہے کہ"مسافروں کو مارنے سے بلوچستان آزاد نہیں ہو سکتا، اور نہ ہی اس طرح کی بزدلانہ کارروائیاں کسی سیاسی مقصد کو حاصل کر سکتی ہیں۔

"انہوں نے کہا کہ اس واقعے میں بے گناہ پنجابی مسافروں کو ان کی زبان اور شناخت کی بنیاد پر چن چن کر قتل کرنا انسانیت کے خلاف جرم ہے، جو نہ صرف ظلم و بربریت کی انتہا ہے بلکہ اس سے دہشتگردوں کا گھنانا چہرہ کھل کر سامنے آ گیا ہے۔ماہ جبین شیران نے کہا کہ"بلوچستان تمام اقوام کا خطہ ہے، اور پنجابی، پشتون، بلوچ، سرائیکی، ہزارہ اور دیگر قومیتوں کے لوگ یہاں مل جل کر آباد ہیں۔

(جاری ہے)

کسی ایک قوم یا شناخت کو نشانہ بنانا ملکی یکجہتی پر حملہ ہے۔"انہوں نے متاثرہ خاندانوں سے دلی ہمدردی اور تعزیت کا اظہار کرتے ہوئے ریاست سے مطالبہ کیا کہ وہ دہشتگردوں کو فوری طور پر کیفر کردار تک پہنچائے۔ماہ جبین شیران نے کہا کہ وہ اس وقت عمرے کی ادائیگی کے لیے مکہ مکرمہ میں موجود ہیں اور مقدس مقامات پر پاکستان و بلوچستان کے امن، اتحاد اور مظلوموں کے لیے خصوصی دعائیں کر رہی ہیں