Live Updates

ن لیگ حکومت خوش قسمت ہے کہ انہیں نالائق اپوزیشن مل گئی

مہنگائی اور بے روزگاری ہے لیکن اپوزیشن ایک ایشو پر بھی یکسو نہیں ہوسکی، پی ٹی آئی کا ایجنڈا شاندار ہے لیکن عملدرآمد کرنے والا کوئی نہیں ، بانی کو اپنے فیصلوں پر نظر ثانی کرنا ہوگی، رہنماء پی ٹی آئی فیصل چوہدری

ثنااللہ ناگرہ پیر 14 جولائی 2025 21:31

ن لیگ حکومت خوش قسمت ہے کہ انہیں نالائق اپوزیشن مل گئی

اسلام آباد( اردوپوائنٹ اخبار تازہ ترین۔ آئی پی اے ۔ 14 جولائی 2025ء )رہنماء پی ٹی آئی اور وکیل فیصل چوہدری نے کہا ہے کہ ن لیگ حکومت خوش قسمت ہے کہ انہیں نالائق اپوزیشن مل گئی،ملک میں مہنگائی اور بے روزگاری ہے لیکن اپوزیشن ایک ایشو پر بھی یکسو نہیں ہوسکی، پی ٹی آئی کا ایجنڈا شاندار ہے لیکن عملدرآمد کرنے والا کوئی نہیں ، بانی کو اپنے فیصلوں پر نظر ثانی کرنا ہوگی ۔

انہوں نے اے آروائی نیوز کے پروگرام میں گفتگو کرتے ہوئے کہا کہ دیکھنا ہوگا کہ تحریک کا لائحہ عمل کیا ہوگا؟ ہر گاؤں گلی کوچے میں جلسہ جلوس نہیں ہوسکتا، تحریک کا ہم نے جو دیکھا ہے، 90ء کی دہائی میں الانگ مارچ ہوتے تھے، الائنس بنا کرتے تھے، جس طرح پی ڈی ایم کا الائنس بنا، وہاں پر سب کو متحرک کیا جاتا تھا، اس الائنس میں وکلاء ، صحافی کسان تاجر اور عوام شامل ہوتے تھے، الائنس کے لوگوں میں دو تین نقا ط پر اتفاق رائے ہوتا تھا۔

(جاری ہے)

حیران ہوں کہ گنڈاپور کے اعلان کے بعد علیمہ خان کیوں نہیں بولیں؟ان کو واضح کرنا چاہیئے، 5 اگست کو تحریک شروع کرنی ہے، 5اگست کو عمران خان کوجیل میں دو سال مکمل ہوجائیں گے، 5اگست کو تحریک کا نقطہ عروج ہوتا اور عمران خان کو جیل سے باہر نکلنا چاہیے تھا۔ انہوں نے کہا کہ پی ٹی آئی کا ایجنڈا شاندار ہے لیکن اس پر عملدرآمد کرنے والا کوئی نہیں ہے، بانی پی ٹی آئی کو اپنے فیصلوں پر نظر ثانی کرنا ہوگی اس کے علاوہ کوئی اور راستہ نہیں، پی ٹی آئی کی جانب سے تحریک سے متعلق کنفیوژن ہے۔

پی ٹی آئی قائدین کی جانب سے واضح حکمت عملی نہیں دی جارہی ، پی ٹی آئی قائدین کی جانب سے مختلف بیانات آرہے ہیں، ن لیگ کی حکومت خوش قسمت ہے کہ انہیں نالائق اپوزیشن مل گئی، ملک میں مہنگائی اور بے روزگاری ہے لیکن اپوزیشن ایک ایشو پر بھی یکسو نہیں ہوسکی۔