مخصوص نشستوں پر کامیابی کے نوٹیفکیشن کے باوجود حلف نہ اٹھانے پر اراکین ووٹ نہیں ڈال سکتے،الیکشن کمیشن

پیر 14 جولائی 2025 22:10

اسلام آباد(اُردو پوائنٹ اخبارتازہ ترین - این این آئی۔ 14 جولائی2025ء)سیکرٹری الیکشن کمیشن کی جانب سے وزیراعلیٰ خیبر پختونخوا علی امین گنڈا پور کو لکھے گئے خط کا متن سامنے آگیا۔الیکشن کمیشن کے سیکرٹری کے خط میں کہا گیا کہ 2جولائی2025کو خواتین و غیر مسلموں کیلئے مخصوص نشستوں پر کامیاب امیدواروں کا نوٹیفکیشن جاری کیا گیا،ان ارکان سے ابھی تک حلف نہیں لیاگیا اس لیے وہ نہ اسمبلی اجلاس میں حصہ لے سکتے ہیں نہ ہی ووٹ ڈال سکتے ہیں۔

خط میں کہا گیاکہ خیبر پختونخوا میں سینیٹ انتخابات کی تاریخ 21جولائی 2025مقرر کی گئی ہے، عدالتوں میں مقدمات اور تاخیر کے باعث حلف کا عمل مکمل نہیں ہو سکا۔الیکشن کمیشن کے خط میں کہا گیاکہ اس سے قبل سپیکر صوبائی اسمبلی کو مخصوص نشستوں پر منتخب ارکان سے حلف لینے کی درخواست کی گئی تھی،سپیکر نے آگاہ کیا کہ اسمبلی کا اجلاس فی الحال جاری نہیں، وہ اجلاس طلب نہیں کرسکتے۔

(جاری ہے)

خط میں کہا گیا کہ آئین کے آرٹیکل109کے مطابق گورنر کو اختیار حاصل ہے کہ وہ صوبائی اسمبلی کا اجلاس اپنی صوابدید پر طلب کرے، آرٹیکل 105میں درج ہے کہ گورنر اپنی آئینی ذمہ داریاں وزیر اعلیٰ یا کابینہ کی مشاورت سے ادا کرے گا، پشاور ہائیکورٹ 27مارچ 2024کے ایک فیصلے میں اپنی رائے دے چکی ہے کہ صوبائی حکومت تمام ضروری اقدامات کرے۔