پنجاب میں فری لانسرز کے لئے انٹرنیشنل سرٹیفکیشن پروگرام شروع کیا ہے، مریم نوازشریف

منگل 15 جولائی 2025 19:10

لاہور (اُردو پوائنٹ اخبارتازہ ترین - اے پی پی۔ 15 جولائی2025ء) حکومت پنجاب نے پنجاب میں فری لانسرز کے لئے انٹرنیشنل سرٹیفکیشن پروگرام شروع کیا ہے۔ سرکاری سکولوں میں ایڈ ٹیک، میٹرک پائلٹ پراجیکٹ شروع ہوچکا ہے۔ زراعت، ماحولیات سمیت ہر سرکاری محکمے میں انٹرن شپ کا آغاز کیا ہے۔ وزیر اعلی مریم نواز شریف نے نوجوانوں کی فنی مہارتکے عالمی دن پر اپنے پیغام میں کہا کہ آج کی دنیا تعلیم کے ساتھ ہنر کی بھی طالب ہے۔

ڈگری کے ساتھ ہنر ہی وہ طاقت ہے جو قوموں کی تقدیر بدل دیتی ہے۔ مہارت صرف روزگار کا ذریعہ نہیں بلکہ خود اعتمادی اور قومی ترقی کی ضمانت ہے۔ انہوں نے کہا کہ دور حاضر میں ہنر ہی ترقی کی کلید ہے، نوجوانوں کو آئی ٹی اسکلز فراہم کی جا رہی ہیں جو اس وقت کا سب سے بڑا ٹول ہیں۔

(جاری ہے)

نواز شریف آئی ٹی سٹی نوجوانوں کی سکلز کو پلیٹ فارم اور تقویت دے گا۔

TEVTA پنجاب کے نوجوانوں کو جدید دور کی ضرورتوں کے مطابق تربیت دے رہا ہے۔ وزیراعلی مریم نواز شریف نے کہا کہ میرا عزم ہے کہ ہر نوجوان کوہنر مند ضرور ہونا چاہیے، انہوں نے کہا کہ میرا خواب ہے کہ پنجاب کا نوجوان نوکری کا طلب گار نہیں بلکہ روزگار دینے کے قابل ہو۔وزیر اعلی پنجاب نے کہا کہ میرا مشن ہے کہ ہمارے نوجوان فری لانسنگ سے لے کر انٹرپرینیور شپ تک ہر میدان میں کامیاب ہوں۔