سرینگرمیں متحدہ مجلس علماء کا اہم اجلاس ، فرقہ وارانہ اشتعال انگیزیوں کے تدارک کیلئے پینل قائم

منگل 15 جولائی 2025 20:50

سرینگر (اُردو پوائنٹ اخبارتازہ ترین - اے پی پی۔ 15 جولائی2025ء) غیرقانونی طورپر بھارت کے زیر قبضہ جموں وکشمیرمیں مختلف سیاسی ، سماجی اورمذہبی تنظیموں کے مشترکہ پلیٹ فارم متحدہ مجلس علماء نے سرینگر میں منعقدہ اجلاس میں ایک پینل تشکیل دیا جوحالیہ متنازعہ اوراشتعال انگیز بیان پربھارت نواز سیاستدان عمران رضا انصاری سے وضاحت طلب کریگا۔کشمیر میڈیا سروس کے مطابق یہ اجلاس عمران رضا انصاری کے حالیہ اشتعال انگیز اور غیر ذمہ دارانہ بیانات، اس پر سامنے آنے والے شدید عوامی ردعمل اور سوشل میڈیاپر اس کے اثرات کا جائزہ لینے کے لیے بلایا گیا تھا۔

اجلاس میں میر واعظ عمر فاروق، مفتی ناصر الاسلام، آغا سید حسن الموسوی الصفوی، مولانا مسرور عباس انصاری، آغا سید محمد ہادی، مفتی نذیر احمد قاسمی، مولانا شوکت کینگ، مفتی محمد یعقوب بابا اور مولانا رحمت اللہ قاسمی نے شرکت کی ۔

(جاری ہے)

ایم ایم یو نے متفقہ طور پر اس بات کا اعادہ کیا کہ صحابہ کرام رضوان اللہ علیہم اجمعین اور اہل بیت کی حرمت اور احترام تمام مسلمانوں کے ایمان کا مشترکہ بنیادی عقیدہ ہے۔

یہ عظیم ہستیاں ہمارے ایمان کا ستون ہیں اور ان کی توہین، اشتعال انگیزی یا تضحیک کسی صورت برداشت نہیں کی جائے گی۔پینل میں آغا سید حسن الموسوی الصفوی، مفتی نذیر احمد قاسمی، آغا سید محمد ہادی اور مفتی محمد یعقوب بابا شامل ہوں گے۔ یہ پینل عمران رضا انصاری کو صحابہ کرام رضوان اللہ علیہم اجمعین سے متعلق بیانات پر وضاحت مانگنے کے لیے طلب کرے گا۔ یہ ان افراد کو بھی طلب کرے گا جو سوشل میڈیا اور دیگر پلیٹ فارمز پر اہل بیت کے بارے میں نامناسب زبان استعمال کرنے میں ملوث ہیں۔