لاپتا شہری کیس،اسلام آبادہائیکورٹ کی حکام کو 15روز میں امدادی چیک لاپتا شہری کے اہل خانہ کو دینے کی ہدایت

منگل 15 جولائی 2025 20:55

اسلام آباد(اُردو پوائنٹ اخبارتازہ ترین - این این آئی۔ 15 جولائی2025ء)اسلام آباد ہائی کورٹ نے وزارت داخلہ حکام کو ہدایت دی ہے کہ 15روز میں پراسس مکمل ہونے کے بعد امدادی چیک لاپتا شہری کے اہل خانہ کو وصول کرایا جائے۔منگل کواسلام آباد ہائی کورٹ میں لاپتا شہری عبد اللہ عمر کی بازیابی کیلئے ان کی اہلیہ زینب زعیم کی درخواست سے متعلق چیئرمین لاپتہ افراد بازیابی کمیشن کی عدم تعیناتی و متاثرہ فیملی کو پچاس لاکھ کا چیک نہ دینے پر توہین عدالت کیس کی سماعت ہوئی۔

جسٹس محسن اخترکیانی نے لاپتہ شہری کی اہلیہ زینن زعیم کی درخواست پر سماعت کی، درخواست گزار کی جانب سے وکیل خالد عباسی ایڈوکیٹ عدالت میں پیش ہوئے۔عدالت نے 15روز میں پراسس مکمل کرنے اور متاثرہ خاندان کو امدادی چیک دینے کی ہدایت کی۔

(جاری ہے)

ایڈیشنل اٹارنی جنرل راشد حفیظ، وزادت دفاع اور وزارت داخلہ حکام بھی عدالت میں پیش ہوئے۔عدالت نے لاپتہ شہری کے والد کو ہدایت دی کہ نادرا سے ایف آر سی بنوائیں اور نکاح نامہ کی کاپی بھی کمیشن میں جمع کرائیں، اپنے بیان حلفی بھی لاپتہ افراد بازیابی کمیشن میں جمع کرائیں۔

عدالت نے وزارت داخلہ کے حکام سے استفسار کیا کہ آپ کتنے دنوں تک امدادی چیک متاثرہ فیملی کو دیں گے، جس پر وزارت داخلہ حکام نے جواب دیا کہ کمیشن سے رپورٹ کے بعد چیک کا پراسس ہفتہ دس روز کاہوتاہے۔عدالت نے وزارت داخلہ حکام کو ہدایت دی کہ 15 روز میں پراسس مکمل ہونے کے بعد امدادی چیک متاثرہ فیملی کو وصول کرایا جائے۔عدالت نے درخواست پر سماعت ستمبر تک ملتوی کردی۔