آئی سی سی اجلاس میں ایشیا کپ کا معاملہ بھی اٹھائے جانے کا امکان

آئی سی سی ارکان اجلاس میں ایشیا کپ کے مستقبل کا فیصلہ بھی کریں گے

بدھ 16 جولائی 2025 20:10

لاہو (اُردو پوائنٹ اخبارتازہ ترین - این این آئی۔ 16 جولائی2025ء)بھارتی میڈیا کو ایشیا کپ کے حوالے سے کسی پل چین نہیں آرہا اور اب دعویٰ کیا ہے کہ انٹرنیشنل کرکٹ کونسل کے آج ( جمعرات ) سے سنگاپور میں ہونے والے اجلاس میں ایشیا کپ کا معاملہ بھی اٹھایا جائے گا۔کرکٹ کے دوسرے اہم امور پر تبادلہ خیال کے ساتھ آئی سی سی ارکان ایشیا کپ کے مستقبل کا فیصلہ بھی کریں گے، اجلاس 17سے 20جولائی تک شیڈول ہے۔

(جاری ہے)

آئی سی سی میٹنگز میں پی سی بی کے سید سمیر احمد کے ساتھ محسن نقوی کی بھی شرکت متوقع ہے، بھارتی آفیشلز بھی اجلاس کا حصہ ہوں گے۔دوسری جانب، بھارتی میڈیا کئی دنوں سے ایشیا کپ کے پیچھے پڑا ہوا ہے اور اب آئی سی سی اجلاس کا نیا شوشہ چھوڑا ہے۔بی سی سی آئی حکام اور بھارتی میڈیا مل کر ایشین کرکٹ کونسل اجلاس کو ناکام بنانے کے در پہ ہیں، وہ اجلاس اور ایشیا کپ دونوں کو ملتوی کرنے کی کوششوں میں ہیں۔چند دن پہلے بھارتی میڈیا نے ہی رپورٹ کیا تھا کہ ایشیا کپ پانچ ستمبر سے یواے ای میں ہوگا۔