کراچی میں تیز رفتار منی بس نے موٹرسائیکل سوار فیملی کو روند دیا، شوہر جاں بحق

بدھ 16 جولائی 2025 22:40

کراچی(اُردو پوائنٹ اخبارتازہ ترین - این این آئی۔ 16 جولائی2025ء)شہر قائد کے علاقے کورنگی میں منی بس کی ٹکر سے شوہر جاں بحق جبکہ بیوی شدید زخمی ہوگئی۔تفصیلات کے مطابق شہر میں بڑی گاڑیوں سے بڑھتے ہوئے ٹریفک حادثات میں کورنگی کے علاقے میں تیز رفتار منی بس نے موٹر سائیکل سوار پر مرد اور خاتون کو روند ڈالا۔حادثے میں شوہر جاں بحق جبکہ بیوی شدید زخمی ہوگئی۔

متوفی کی لاش چھیپا کے رضا کاروں نے ضابطے کی کارروائی کے لیے جناح اسپتال پہنچایا۔

(جاری ہے)

ریسکیو حکام کے مطابق متوفی کی شناخت 55 سالہ خالق کے نام سے کی گئی جبکہ متوفی کی اہلیہ 45 سالہ ثنا کو طبی امداد فراہم کی جا رہی ہے، حادثے کے بعد مشتعل افراد نے پتھراو کر کے منی بس کے شیشے توڑ دیئے۔اس حوالے سے ایس ایچ او زمان ٹائون غلام نبی آفریدی نے بتایا کہ حادثہ کورنگی ڈیڑھ نمبر کے قریب پیش آیا جس میں روٹ ایس ایل کی منی بس کی ٹکر سے موٹر سائیکل سوار شوہر جاں بحق اور اس کی اہلیہ زخمی ہوئی تھی اور اس کی حالت بھی تشویشناک بتائی جاتی ہے۔

حادثے کی اطلاع ملتے ہی پولیس نے موقع پر پہنچ کر ڈرائیور اسماعیل کو گرفتار کر کے منی بس کو اپنے قبضے میں لیکر تھانے منتقل کر دیا جبکہ اس حوالے سے مزید تفتیش کا عمل جاری ہے۔