سردار عتیق احمد خان کا کوئٹہ دھماکے پر اظہار افسوس، میجر رب نواز طارق کی شہادت کو خراج عقیدت

جمعرات 17 جولائی 2025 19:15

مظفرآباد (اُردو پوائنٹ اخبارتازہ ترین - این این آئی۔ 17 جولائی2025ء) آل جموں و کشمیر مسلم کانفرنس کے صدر و سابق وزیر اعظم آزاد کشمیر سردار عتیق احمد خان نے کوئٹہ میں ہونے والے افسوسناک دہشت گردی کے واقعے پر دلی رنج و غم کا اظہار کرتے ہوئے کہا ہے کہ قوم دشمنوں کے بزدلانہ حملوں سے مرعوب نہیں ہوگی۔ انہوں نے اس المناک واقعہ میں مظفرآباد سے تعلق رکھنے والے پاک فوج کے بہادر آفیسر میجر رب نواز طارق کی شہادت پر گہرے دکھ اور افسوس کا اظہار کرتے ہوئے اہل خانہ سے دلی ہمدردی کا اظہار کیا۔

(جاری ہے)

سردار عتیق احمد خان نے کہا کہ میجر رب نواز طارق نے مادر وطن کے دفاع کی خاطر اپنی جان قربان کرکے شہادت کا بلند رتبہ پایا۔ ان کی قربانی رائیگاں نہیں جائے گی، پوری قوم اُن کے اس عظیم جذبے کو سلام پیش کرتی ہے۔ پاک فوج کے افسروں اور جوانوں کی قربانیاں وطن عزیز میں امن و سلامتی کی ضمانت ہیں، جنہیں ہمیشہ یاد رکھا جائے گا۔سردار عتیق نے کہا کہ ملک دشمن عناصر کے خلاف کارروائی مزید مؤثر اور فیصلہ کن بنائی جائے تاکہ ایسے سانحات کا مستقل سدباب ہو سکے۔انہوں نے شہید میجر رب نواز طارق کے درجات کی بلندی اور لواحقین کے لیے صبر جمیل کی دعا بھی کی۔