ملک میں شدید بارشوں کے باعث سیلابی صورتحال کا خدشہ، ندی نالوں میں طغیانی کا امکان ، عوام کو احتیاطی تدابیر اختیار کرنے کی ہدایت

جمعرات 17 جولائی 2025 21:53

اسلام آباد (اُردو پوائنٹ اخبارتازہ ترین - آن لائن۔ 17 جولائی2025ء) آئندہ 24 سے 48 گھنٹوں کے دوران ملک کے مختلف علاقوں میں شدید مون سون بارشوں کے پیش نظر ندی نالوں میں طغیانی اور نشیبی علاقوں میں سیلابی صورتحال کا خدشہ ظاہر کیا گیا ہے۔ محکمہ موسمیات اور این ڈی ایم اے کی جانب سے جاری کردہ الرٹ میں کہا گیا ہے کہ پنجاب کے مختلف اضلاع بشمول لاہور، چکوال، اٹک، جہلم، خوشاب، سرگودھا، گوجرانوالہ، فیصل آباد، سیالکوٹ، نارووال، اوکاڑہ، قصور، شیخوپورہ، گجرات اور حافظ آباد میں اگلے 12 گھنٹوں کے دوران آندھی، گرج چمک اور شدید بارش کا امکان ہے۔

اسلام آباد اور راولپنڈی میں بھی آئندہ 24 سے 48 گھنٹوں کے دوران وقفے وقفے سے موسلا دھار بارش جاری رہنے کی پیشگوئی کی گئی ہے، جس کے باعث نالہ لئی میں طغیانی اور قریبی نشیبی علاقوں میں پانی جمع ہونے کے خدشات بڑھ گئے ہیں۔

(جاری ہے)

خطرے کی صورت میں خطرے کے سائرن بجنے پر فوری انخلاء کی ہدایات جاری کی گئی ہیں۔ این ڈی ایم اے نے تمام متعلقہ اداروں کو ممکنہ ہنگامی صورتحال سے نمٹنے کیلئے پیشگی اقدامات کرنے اور نشیبی علاقوں میں فوری نکاسی آب کیلئے مشینری و پمپ تیار رکھنے کی ہدایت جاری کی ہے۔

عوام کو سختی سے تنبیہ کی گئی ہے کہ ندی نالوں، پلوں اور زیرِ آب سڑکوں سے گزرنے سے گریز کریں۔ متاثرہ علاقوں کے مکینوں کو تاکید کی گئی ہے کہ قیمتی سامان اور مویشیوں کو محفوظ مقامات پر منتقل کرنے کا بندوبست کریں اور کم از کم 3 سے 5 دن کی خوراک، پانی، ادویات اور دیگر ضروری اشیاء پر مشتمل ایمرجنسی کٹ تیار رکھیں۔ این ڈی ایم اے کی جانب سے شہریوں کو ‘‘پاک ڈیزاسٹر الرٹ ایپ’’ کے ذریعے موسم اور ممکنہ خطرات سے متعلق مسلسل آگاہ رہنے کی اپیل بھی کی گئی ہے۔ مزید برآں، مقامی انتظامیہ اور امدادی ادارے ہمہ وقت الرٹ ہیں اور متاثرہ علاقوں میں ممکنہ ریسکیو و ریلیف آپریشن کیلئے مکمل تیار ہیں۔