Live Updates

مون سون کا 9 واں سپیل اگلے 24 سے48 گھنٹوں تک مزید جاری رہنے کا امکان ہے، این ڈی ایم اے

بدھ 3 ستمبر 2025 16:48

اسلام آباد (اُردو پوائنٹ اخبارتازہ ترین - اے پی پی۔ 03 ستمبر2025ء) نیشنل ڈیزاسٹر مینجمنٹ(این ڈی ایم اے )نے خبردار کیا ہے کہ مون سون کا 9واں سپیل اگلے 24سے48 گھنٹوں تک مزید جاری رہنے کا امکان ہے،4سے 5ستمبرکے دوران پنجند کے مقام پر راوی، چناب اور ستلج سے آنے والے سیلابی ریلوں کی آمد کے باعث پنجند کے مقام پر شدید سیلابی صورتحال پیدا ہونے کا خدشہ ہے۔

این ڈی این اے کے میڈیا ونگ سے جاری بیان کے مطابق اگلے 24سے48گھنٹون کے دوران ملک کے بالائی علاقوں مزید بارشوں کا سلسلہ جاری رہے گا۔ ناروال، سیالکوٹ،گوجرانوالہ، گجرات اور لاہورمیں پچھلے 24گھنٹوں میں شدید بارشیں ہوئیں۔ اس سپیل کے زیر اثر 6 ستمبر سے ملک کے جنوبی علاقوں بشمول جنوبی پنجاب اورجنوبی سندھ میں بارشوں کا امکان ہے ۔

(جاری ہے)

ملک کے ساحلی علاقے بشمول بدین، سجاول اور تھرپاکر میں شدید بارشوں کا امکا ن ہے ۔

ملک میں غیر معمول بارشوں اور دریاؤں میں پانی کی آمد کے باعث سیلابی صورتحال پیدا ہوئی۔4سے5ستمبرکے دوران پنجند کے مقام پر راوی، چناب اور ستلج کے سیلابی ریلے جمع ہوں گے ۔تینوں دریاؤں سے آنے والے سیلابی ریلوں کی آمد کے باعث پنجند کے مقام پر شدید سیلابی صورتحال پیدا ہونے کا خدشہ ہے۔سیلابی صورتحال سے ممکنہ طور پر متاثرہ علاقوں کی پیشگی نشاندہی کی جا چکی ہے اور متعلقہ پی ڈی ایم ایز کو بھی اس حوالے سے پیشگی آگاہ کر دیا گیا ہے ۔

حساس علاقوں کے مکین متعلقہ اداروں کی ہدایات پر عمل کریں اور اپنی حفاظت یقینی بنائیں۔سیلابی صورتحال کے خطرے سے دوچار علاقوں میں غیر ضروری سفر سے گریز کریں ۔وزیراعظم کی خصوصی ہدایت پر تمام متعلقہ ادارے بر وقت اور پیشگی اقدامات یقینی بنا رہے ہیں۔سیلاب متاثرین کو تقریباً 5 ہزار 700 ٹن امدادی سامان فراہم کیا جا چکا ہے ۔متاثرین کو ضروری سامان کی فراہمی کے لئے تمام حکومتی ادارے، فلاحی ادارے اور افواج پاکستان مشترکہ طور پر کوشاں ہیں ۔بہترین حکمت عملی اور طریقہ کار کو اپناتے ہوئے ضرورتمندوں تک امدادی سامان کی فراہمی کو یقینی بنایا جا رہا ہے۔\932