عراق کے شہر الکوت کے شاپنگ مال میں ہولناک آتشزدگی، 60 افراد جاں بحق

جمعرات 17 جولائی 2025 22:56

الکوت(اُردو پوائنٹ اخبارتازہ ترین - آن لائن۔ 17 جولائی2025ء)عراق کے مشرقی شہر الکوت میں ایک بڑے شاپنگ مال (ہائپر مارکیٹ) میں رات کے وقت لگی شدید آگ نے کم از کم 60 افراد کی جان لے لی، جب کہ 11 افراد تاحال لاپتہ ہیں۔ حکام نے خدشہ ظاہر کیا ہے کہ مزید لاشیں جلے ہوئے ملبے تلے دبی ہو سکتی ہیں۔سوشل میڈیا پر گردش کرتی ویڈیوز میں دیکھا جا سکتا ہے کہ پانچ منزلہ عمارت آگ کی لپیٹ میں ہے، اور فائرفائٹرز آگ پر قابو پانے کی کوشش کر رہے ہیں۔

تاہم رائٹرز نے ان ویڈیوز کی آزادانہ تصدیق نہیں کی۔

(جاری ہے)

شہر کے محکمہ صحت کے ایک اہلکار نے بتایا: ''ہم نے 59 افراد کی شناخت کرلی ہے، لیکن ایک لاش اتنی بری طرح جھلس چکی ہے کہ اس کی شناخت ممکن نہیں ہو سکی۔''الکوت کے ایک اعلیٰ اہلکار علی المیاحی نے کہا کہ ''کئی لاشیں ابھی ملبے کے نیچے پھنسی ہوئی ہیں، جنہیں نکالنے کی کوشش جاری ہے۔''ابھی تک آگ لگنے کی وجہ سامنے نہیں آسکی۔ تاہم صوبے کے گورنر نے سرکاری نیوز ایجنسی (INA) کو بتایا کہ ''48 گھنٹوں میں ابتدائی تحقیقات کا نتیجہ جاری کر دیا جائے گا۔'' گورنر کے مطابق مال اور عمارت کے مالکان کے خلاف مقدمات درج کر لیے گئے ہیں۔