ایس ای سی پی نے رپورٹ ’’ایمپاورنگ انوویشن: روڈ میپ فار سٹارٹ اپس‘‘ کا آغاز کر دیا

جمعرات 17 جولائی 2025 23:07

اسلام آباد (اُردو پوائنٹ اخبارتازہ ترین - اے پی پی۔ 17 جولائی2025ء) سکیورٹیز اینڈ ایکسچینج کمیشن آف پاکستان (ایس ای سی پی)نے اپنی رپورٹ "ایمپاورنگ انوویشن: روڈ میپ فار سٹارٹ اپس" کا آغاز کیا جو گزشتہ سال کراچی میں منعقدہ پاکستان سٹارٹ اپ سمٹ 2024 کا فالو اپ ہے۔ اس تقریب میں پالیسی سازوں، کاروباری افراد، سرمایہ کاروں، اور فکری رہنماؤں سمیت مختلف اسٹیک ہولڈرز نے شرکت کی۔

جمعرات کو یہاں جاری پریس ریلیز کے مطابق یہ رپورٹ سمٹ میں ہونے والی بات چیت پر مبنی ہے اور اس میں مختلف سٹیک ہولڈرز کی آراء کو شامل کیا گیا ہے جس میں پاکستان کے سٹارٹ اپ ایکو سسٹم میں درپیش اہم چیلنجز اور مواقع کو اجاگر کیا گیا ہے۔ یہ ایس ای سی پی کی جانب سے سٹارٹ اپس کی ترقی کو سپورٹ کرنے کے لئے متعارف کرائے گئے ریگولیٹری اقدامات کو بھی نمایاں کرتی ہے۔

(جاری ہے)

مزید برآں یہ رپورٹ ریگولیٹرز، سرکاری اداروں، مالیاتی اداروں، کاروباری افراد اور سرمایہ کاروں کے لئے قابل عمل سفارشات کے ساتھ ایک مستقبل کا روڈ میپ فراہم کرتی ہے۔ایس ای سی پی کے کمشنر ذیشان رحمان خٹک نے شرکاء کا ان کے قابل قدر تعاون پر شکریہ ادا کیا اور ریگولیٹرز اور سٹارٹ اپس کے درمیان خلیج کو ختم کر کے جدت کو فروغ دینے کے ایس ای سی پی کے عزم کا اعادہ کیا۔

انہوں نے پائیدار ترقی کو آگے بڑھانے کے لئے تمام سٹیک ہولڈرز کے درمیان تعاون کی اہمیت پر زور دیا۔ شرکاء نے ابھرتے ہوئے چیلنجز سے نمٹنے اور ریئل ٹائم فیڈ بیک کی بنیاد پر پالیسیوں کو بہتر بنانے کے لئے سٹارٹ اپس، سرمایہ کاروں، اور ریگولیٹرز کے درمیان باقاعدہ مشاورت کی ضرورت پر بھی اتفاق کیا۔مکمل رپورٹ اب ایس ای سی پی کی آفیشل ویب سائٹ پر عوامی رسائی کے لئے دستیاب ہے۔