Live Updates

عوام پر پٹرول بم گرانے کا نتیجہ، رواں ہفتے کے دوران، چکن، انڈے، پیاز، آلو سمیت 22 اشیاء مزید مہنگی ہو گئیں

نئے مالی سال کے مسلسل تیسرے ہفتے کے دوران مہنگائی کی شرح میں اضافہ، ہفتہ وار مہنگائی کی شرح میں مزید صفر عشاریہ 38 فیصد اضافہ ہو گیا

محمد علی جمعہ 18 جولائی 2025 20:30

لاہور (اُردو پوائنٹ اخبارتازہ ترین۔ 18 جولائی2025ء) عوام پر پٹرول بم گرانے کا نتیجہ، رواں ہفتے کے دوران، چکن، انڈے، پیاز، آلو سمیت 22 اشیاء مزید مہنگی ہو گئیں، نئے مالی سال کے مسلسل تیسرے ہفتے کے دوران مہنگائی کی شرح میں اضافہ، ہفتہ وار مہنگائی کی شرح میں مزید صفر عشاریہ 38 فیصد اضافہ ہو گیا ۔ تفصیلات کے مطابق پٹرولیم مصنوعات کی قیمتوں میں اضافے کے اثرات سامنے آنے لگے، نئے مالی سال کے تیسرے ہفتے میں بھی مہنگائی میں اضافہ ہوگیا، ہفتہ وار بنیاد پر مہنگائی کی شرح 0.38 فیصدبڑھنے کے بعد مجموعی سالانہ شرح منفی 1.61 فیصد پر آگئی۔

ادارہ شماریات نے مہنگائی سے متعلق ہفتہ وار رپورٹ جاری کردی، رپورٹ کے مطابق ایک ہفتے میں 22 اشیائے ضروریہ کی قیمتوں میں اضافہ ہوا، 9 اشیا سستی ہوئیں، 20 اشیا کی قیمتوں میں استحکام رہا۔

(جاری ہے)

ادارہ شماریات کے مطابق حالیہ ہفتے ڈیزل 4.15 اور پیٹرول کی قیمت 2 فیصد بڑھ گئی، ایک ہفتے میں چکن 8.31 اور انڈی5.87 فیصد مہنگے ہوئے جبکہ پیاز 1.76 اور آلوکی قیمت میں1.46 فیصد کا اضافہ ہوا۔

ادارہ شماریات کی رپورٹ کے مطابق ایک ہفتے میں لہسن کی قیمت میں 1.70 فیصد کا اضافہ ہوا تاہم ٹماٹر، آٹا، کوکنگ آئل، چینی اور ایل پی جی کی قیمتوں میں کمی ہوئی۔ پنجاب بھر میں مہنگائی مافیا نے ایک بار پھر غریب عوام کا جینا دوبھر کر دیا ہے۔ مرغی کے گوشت کی فی کلو قیمت 595 روپے پر برقرار ہے، جس نے پہلے ہی مہنگائی سے پسے ہوئے صارفین کو مزید مشکلات سے دوچار کر دیا ہے۔

مارکیٹ ذرائع کے مطابق فارمی انڈوں کی قیمت میں بھی ایک روپے فی درجن کا اضافہ ہوا ہے، جس کے بعد فی درجن انڈے 260 روپے میں فروخت ہو رہے ہیں۔انڈوں کی پیٹی اب 7 ہزار 680 روپے تک جا پہنچی ہے، جس سے متوسط طبقے کی مشکلات مزید بڑھ گئی ہیں۔دوسری جانب سبزیوں کی قیمتیں بھی آسمان سے باتیں کر رہی ہیں۔ بھنڈی 300 روپے فی کلو، شملہ مرچ 180 روپے فی کلو اور اروی 200 روپے فی کلو میں فروخت ہو رہی ہے۔ یہ قیمتیں عام آدمی کے لیے ناقابل برداشت بنتی جا رہی ہیں۔پھلوں کی قیمتوں میں بھی غیرمعمولی اضافہ دیکھنے میں آ رہا ہے۔سیب 650 روپے فی کلو، آڑو 380 روپے فی کلو، اور آم (سندھڑی) 320 روپے فی کلو میں مارکیٹ میں دستیاب ہیں۔