ْپی ڈی ایم اے پنجاب نے دریائے راوی ،ستلج اور چناب میں سیلاب سے نقصانات کی رپورٹ جاری کردی

لاہور (اُردو پوائنٹ اخبارتازہ ترین - این این آئی۔ 02 ستمبر2025ء)پی ڈی ایم اے پنجاب نے دریائے راوی ،ستلج اور چناب میں سیلاب کے باعث ہونے والے نقصانات کی رپورٹ جاری کردی۔ ریلیف کمشنر پنجاب نبیل جاوید نے رپورٹ کی تفصیل بتاتے ہوئے کہا ہے کہ دریائے راوی، ستلج اور چناب میں شدید سیلابی صورتحال کے باعث 32 سو سے زائد موضع جات متاثر ہوئے۔دریائوں میں سیلابی صورتحال کے باعث مجموعی طور پر 24 لاکھ 52 ہزار لوگ متاثر ہوئے۔

سیلاب میں پھنس جانے والے 9 لاکھ 99 ہزار لوگوں کو محفوظ مقامات پر منتقل کیا گیا۔شدید سیلاب سے متاثرہ اضلاع میں 395 ریلیف کیمپ قائم کیے گئے ہیں۔متاثر ہونے والے اضلاع میں 392 میڈیکل کیمپ بھی قائم کیے گئے ہیں۔ریلیف کمشنر نے کہا کہ مویشیوں کو علاج معالجے کی سہولت فراہم کرنے کے لیے 336 ویٹرنری کیمپ قائم کیے گئے ہیں۔

(جاری ہے)

متاثرہ اضلاع میں ریسکیو ریلیف سرگرمیوں میں 7 لاکھ 8 ہزار جانوروں کو محفوظ مقامات پر منتقل کیا گیا۔

انہوں نے کہا کہ دریائے ستلج گنڈا سنگھ والا کے مقام پر انی کا بہائو 2 لاکھ 53 ہزار کیوسک جبکہ سلیمانکی کے مقام پہ پانی کا بہائو 1 لاکھ 24 ہزار کیوسک ہے۔دریائے چناب میں بڑا سیلابی ریلا جنوبی پنجاب کی طرف بڑھ رہا ہے۔دریائے چناب میں مرالہ کے مقام پر پانی کا بہائو 96 ہزار کیوسک جبکہ چناب میں خانکی ہیڈ ورکس کے مقام پہ پانی کا بہائو 1 لاکھ 20 ہزار کیوسک ہے،اسی طرح قادر آباد کے مقام پہ پانی کا بہائو 1 لاکھ 35 ہزار کیوسک ہے۔

ریلیف کمشنر نے کہا کہ ہیڈ تریموں کے مقام پر انتہائی اونچے درجے کا سیلاب ہے، تریموں کے مقام پر پانی کا بہائو 5 لاکھ 16 ہزار کیوسک ہے اور اس میں مسلسل اضافہ ہو رہا ہے۔ریلیف کمشنر نے کہا کہ دریائے راوی میں جسڑ کے مقام پر پانی کا بہائو 54 ہزار کیوسک جبکہ شاہدرہ کے مقام پر پانی کا بہائو 60 ہزار کیوسک ہے،بلوکی ہیڈ ورکس پر پانی کا بہائو 1 لاکھ 37 ہزار کیوسک ہے جبکہ ہیڈ سدھنائی کے مقام پر پانی کا بہائو1 لاکھ7 ہزار کیوسک ہے۔

ریلیف کمشنر نے کہا کہ منگلا ڈیم 82 فیصد جبکہ تربیلا ڈیم 100 فیصد تک بھر چکا ہے۔دریائے ستلج پر موجود بھارت کا بھاکڑا ڈیم 84 فیصد تک بھر چکا ہے۔پونگ ڈیم98 فیصد جبکہ تھین ڈیم92 فیصد تک بھر چکا ہے۔ریلیف کمشنر نے کہا کہ حالیہ سیلاب میں ڈوبنے سے 41 شہری جاں بحق ہوئے۔وزیر اعلی پنجاب کی ہدایات کے پیش نظر شہریوں اورکسانوں کے نقصانات کا تخمینہ لگا کر ازالہ یقینی بنایا جائے گا۔نبیل جاوید نے کہا گزشتہ 24 گھنٹوں میں پنجاب کے بیشتر اضلاع میں مون سون بارشیں ریکارڈ کی گئی۔ نارووال میں 77 ملی میٹر راولپنڈی 64، مری 34، ڈی جی خان 31، لاہور 21، گجرانوالہ 15، گجرات 6، سیالکوٹ 6 اور ملتان 2 ملی میٹر تک بارش ریکارڈ کی گئی۔