پنجاب حکومت سیلاب متاثرین کے شانہ بشانہ کھڑی، سوشل میڈیا پر پروپیگنڈے سے گریز کیا جائے‘ عظمیٰ بخاری

لاہور (اُردو پوائنٹ اخبارتازہ ترین - این این آئی۔ 02 ستمبر2025ء)وزیر اطلاعات و ثقافت پنجاب عظمیٰ بخاری نے کہا کہ پنجاب میں سیلابی صورتحال حکومت کے کنٹرول میں ہے اور متاثرین کی بحالی کے لیے ہنگامی بنیادوں پر اقدامات جاری ہیں،اب تک 9 لاکھ 99 ہزار سے زائد افراد کو محفوظ مقامات پر منتقل کیا جا چکا ہے جبکہ 7 لاکھ سے زائد مویشیوں کو بھی ریسکیو کر کے محفوظ مقام پر منتقل کیا گیا ہے، مجموعی طور پر 3243 سے زائد مواضعات اور 24 لاکھ سے زائد آبادی سیلاب سے متاثر ہوئی ہے۔

ان خیالات کا اظہار انہوں نے ڈی جی پی آر میں اہم پریس کانفرنس کرتے ہوئے کیا۔عظمیٰ بخاری نے کہا کہ تریمو ڈیم پر سب سے زیادہ دباؤ ہے، تاہم دریائے راوی میں پانی کی سطح تیزی سے کم ہو رہی ہے۔ حکومت نے 395 ریلیف کیمپس قائم کیے ہیں جن میں متاثرہ افراد کو رہائش اور معیاری کھانا فراہم کیا جا رہا ہے۔

(جاری ہے)

اس کے ساتھ ساتھ 392 میڈیکل کیمپس اور 336 ویٹرنری کیمپس بھی قائم کیے گئے ہیں تاکہ انسانی اور حیوانی جانوں کو زیادہ سے زیادہ تحفظ دیا جا سکے۔

انہوں نے کہا کہ مریم نواز نے متاثرہ علاقوں کے دورے کیے، فیلڈ ہسپتالوں کا معائنہ کیا اور عوام کو یقین دلایا کہ ایک ایک گھر دوبارہ آباد کرنے تک چین سے نہیں بیٹھیں گے۔ محکمہ صحت کو ہدایت دی گئی ہے کہ ڈی ایچ کیوز اور ٹی ایچ کیوز میں سہولیات کی کمی کو فوری طور پر دور کیا جائے تاکہ وبائی امراض کے خدشے کو ختم کیا جا سکے۔عظمیٰ بخاری نے کہا کہ پنجاب حکومت نے ریسکیو 1122 کے اہلکاروں کی انتھک محنت کو سراہا ہے، تاہم ان کی مزید حوصلہ افزائی کی ضرورت ہے۔

انہوں نے خبردار کیا کہ سوشل میڈیا پر پھیلائی جانے والی جھوٹی خبروں سے اجتناب کیا جائے اور صرف سرکاری ذرائع پر اعتماد کیا جائے۔وزیر اطلاعات نے کہا کہ پاکستان موسمیاتی تبدیلیوں سے شدید متاثر ہو رہا ہے، اس لیے مستقل حل کے لیے ڈیمز کی تعمیر ناگزیر ہے۔ انہوں نے علی امین گنڈا پور کے کالا باغ ڈیم کے بیان سے اتفاق کرتے ہوئے کہا کہ اب ہمیں بطور قوم مل بیٹھ کر قومی حکمت عملی وضع کرنا ہوگی تاکہ سیلابی تباہ کاریوں سے بچا جا سکے۔

انہوں نے کہا کہ مریم نواز کی کمٹمنٹ ہے کہ نئے ڈیمز پر کام کیا جائے گا کیونکہ یہ وقت کی اہم ضرورت ہے۔آخر میں انہوں نے کہا کہ اس وقت عوام دیکھ رہے ہیں کہ کون ان کے ساتھ کھڑا ہے اور کون محض پروپیگنڈا کر رہا ہے۔ پنجاب حکومت ہر لمحہ متاثرین کے ساتھ کھڑی ہے اور کسی کو بھی تنہا نہیں چھوڑے گی۔