Live Updates

ہماری تیاری نہیں تھی، سیلاب کیلئے پلان مکمل نہیں کیا

ملک کو بیوروکریسی نے کھایا، سب پیسہ بنانے میں مصروف تھے، وزیر دفاع خواجہ آصف کا اعتراف

محمد علی منگل 2 ستمبر 2025 20:21

لاہور (اُردو پوائنٹ اخبارتازہ ترین۔ 02 ستمبر2025ء) خواجہ آصف نے اعتراف کیا ہے کہ ہماری تیاری نہیں تھی، سیلاب کیلئے پلان مکمل نہیں کیا، ملک کو بیوروکریسی نے کھایا، سب پیسہ بنانے میں مصروف تھے۔ تفصیلات کے مطابق وزیر دفاع خواجہ آصف نے ایک مرتبہ پھر ملک میں ہونے والی سیلاب کی تباہی پر بیوروکریسی کو آڑے ہاتھوں لے لیا۔ اپنے بیان میں وزیر دفاع نے بیوروکریسی کو شدید تنقید کا نشانہ بناتے ہوئے الزام عائد کیا کہ بیوروکریسی پیسے بنا رہی ہے، ملک کھا گئی۔

سیلاب کے حوالے سے ہماری تیاری نہیں تھی، سیلاب کیلئے پلان مکمل نہیں کیا، سب پیسہ بنانے میں مصروف تھے۔ خواجہ آصف کے الزامات پر ان ہی کی جماعت کے وفاقی وزیر حنیف عباسی نے ردعمل دیتے ہوئے کہا ہے کہ بیوروکریسی کو بُرا کہنے کا بڑا شوق چڑھا ہوا ہے، اپنی شہرت کیلئے اپنے ہی ایوان پر الزام تراشی کر رہے ہیں، نظام کو ہائبرڈ نظام کہتے ہیں، جس نظام کا حصہ ہیں اسی کو بیٹھ کر گالیاں دیتے ہیں، یہی کچھ کرنا ہے تو حکومت سے نکل جائیں کیوں کہ حکومت میں بیٹھ کر اپوزیشن والی باتیں زیب نہیں دیتیں۔

(جاری ہے)

حنیب عباسی کہتے ہیں کہ کس کنٹریکٹر کی جرات ہے کہ راولپنڈی میں غیر معیاری کام کرکے پیمنٹ لے لے، میرے ضلع میں کوئی کام غلط ہے تو میں کیسے ذمہ دار نہیں؟ اپنے گریبانوں میں جھانکیں، ہم نے بڑے بڑے پل اور ہسپتال بنائے لیکن کسی کنٹریکٹر پر الزام نہیں لگایا کیوں کہ اگر سارا یہی کچھ بیان کرنا ہے تو حکومت سے اٹھ کر اپوزیشن میں چلے جانا چاہیئے یہ باتیں حکومتی بینچوں پر بیٹھ کر تو زیب نہیں دیتیں، دراصل ہر کسی کو وائرل ہونے کا شوق ہے، اور بھی بہت چیزیں ہیں، اللہ سے ڈریں کہ وہ چیزیں نہ وائرل ہو جائیں، اپنے آدھا کلو گوشت کی خاطر پوری بھینس ذبح کرنے کی کوشش نہیں کرنی چاہیئے۔