وزیراعلیٰ مریم نواز سے چوہدری نصیر احمد عباس ،ملک نور اعوان کی ملاقات، ترقیاتی منصوبوں اور اوورسیز پاکستانیوں کے مسائل بارے گفتگو کی

ہفتہ 19 جولائی 2025 16:10

لاہور (اُردو پوائنٹ اخبارتازہ ترین - اے پی پی۔ 19 جولائی2025ء) وزیراعلیٰ پنجاب مریم نواز شریف سے ہفتے کے روز رکن قومی اسمبلی چوہدری نصیر احمد عباس اور مسلم لیگ (ن)جاپان کے صدر ملک نور اعوان نے یہاں ملاقات کی اور باہمی دلچسپی کے امور، ترقیاتی منصوبوں اور اوورسیز پاکستانیوں کے مسائل بارے تفصیلی گفتگو کی ۔صدر مسلم لیگ (ن) جاپان نے پنجاب میں امن و امان کی بہتری پر اوورسیز پاکستانیوں کے انویسٹمنٹ کے بڑھتے رحجان سے آگاہ کیا جبکہ ملک نور اعوان نے جاپان میں مقیم پاکستانی کمیونٹی کی خدمات اور ان کے مسائل کے بارے میں بتایا۔

ایم این اے نصیر عباس اور مسلم لیگ (ن) جاپان کے صدر ملک نور اعوان نے پنجاب میں عوام دوست پراجیکٹس شروع کرنے پر وزیر اعلیٰ کو خراج تحسین پیش کیا۔

(جاری ہے)

وزیر اعلیٰ نے کہا کہ مسلم لیگ(ن)عوامی خدمت کی سیاست پر یقین رکھتی ہے،ہر علاقے کی یکساں ترقی اور عوامی فلاح کےلئے تمام وسائل بروئے کار لائے جا رہے ہیں،مثالی گائوں پراجیکٹ کے تحت دیہات میں شہروں جیسی اعلیٰ معیار ی سہولتیں فراہم کر رہے ہیں،پنجاب کے بارہ ہزار کلومیٹر روڈز کی تعمیر و بحالی ہو چکی ہے جبکہ دسمبر تک 18 ہزار کلومیٹر مکمل ہو جائے گی۔

انہوں نے کہاکہ فیلڈ ہسپتال اور کلینک آن ویلز سے ایک کروڑ سے زائد مریض گھر کی دہلیز پر صحت کی سہولیات سے مستفید ہو چکے ہیں، پنجاب میں نئے ہسپتالوں کی تعمیر بھی تکمیل کے آخری مراحل میں داخل ہو چکی ہے ، ہسپتالوں میں مریضوں کو مفت ادویات کی فراہمی کا سلسلہ جاری ہے ۔مریم نواز شریف نے کہا کہ وطن عزیز کی ترقی میں اوورسیز پاکستانیوں کا کردار ناقابل فراموش ہے،بیرون ملک پاکستانی ملک کا قابل فخر سرمایہ ہیں اور حکومت ان کے مسائل کے حل کےلئے تمام ممکن اقدامات کر رہی ہے،حکومت پنجاب سرمایہ کاری کے مواقع بڑھا رہی ہے تاکہ اوورسیز کمیونٹی کی محنت ملک کی خوشحالی میں ڈائریکٹ شامل ہو سکے۔

رکن قومی اسمبلی چوہدری نصیرعباس نے کہا کہ وزیراعلیٰ مریم نواز شریف کی قیادت میں پنجاب میں عوامی خدمت کے نئے باب رقم ہو رہے ہیں،ان کی انتھک محنت اور ہر شعبے پر ذاتی توجہ عوام میں امید اور اعتماد کا باعث بن رہی ہے۔ملک نور اعوان نے کہا کہ مختصر وقت میں مثالی خدمت کرنے پر بیرون ملک مقیم پاکستانی وزیر اعلیٰ کے وژن کو خراج تحسین پیش کرتے ہیں، اوورسیز کمیونٹی کو اطمینان ہے کہ پنجاب حکومت ان کے مسائل حل کرے گی۔\932