Live Updates

پی ڈی ایم اے کی جانب سے پنجاب کے دریائوں میں فلڈ پری الرٹ جاری ،21 جولائی سے سیلابی صورتحال کا خدشہ، ترجمان

ہفتہ 19 جولائی 2025 18:21

لاہور (اُردو پوائنٹ اخبارتازہ ترین - اے پی پی۔ 19 جولائی2025ء) پی ڈی ایم اے کی جانب سے پنجاب کے تمام بڑے دریائوں اور ملحقہ نالوں میں فلڈ بارے پری الرٹ جاری کردیا گیا، دریائوں میں پانی کے غیر معمولی اضافے اور سیلاب کا خدشہ ہے۔ ترجمان پی ڈی ایم اے کے مطابق 21 جولائی سے پنجاب کے دریائوں میں سیلابی صورتحال بن سکتی ہے جس سے 22 جولائی کو دریائے چناب، جہلم، راوی، ستلج ، سندھ اور ان سے ملحقہ ندی نالوں اور نشیبی علاقوں میں سیلاب کا خدشہ ہے، اس سلسلہ میں صوبہ بھر کے کمشنرز و ڈپٹی کمشنرز کو الرٹ جاری کر دیا گیا۔

ترجمان نے بتایا کہ پی ڈی ایم اے نے ریسکیو 1122 کو تمام تر انتظامات پیشگی مکمل کرنے کی ہدایات بھی کردی ہیں جبکہ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو اسٹاک اور محکمہ ٹرانسپورٹ کو الرٹ جاری کر دیا گیا ہے۔

(جاری ہے)

ڈی جی پی ڈی ایم اے عرفان کاٹھیا نے کہا ہے کہ متعلقہ انتظامیہ وزیر اعلیٰ پنجاب کی ہدایات کے پیش نظر تمام تر انتظامات پیشگی مکمل کریں،ایمرجنسی کنٹرول رومز میں سٹاف کو الرٹ رکھا جائے۔

ریسکیو 1122 کی ڈیزاسٹر رسپانس ٹیموں کو بھی ہائی الرٹ رکھا جائے جبکہ ریسکیو آپریشن کے لیے پٹرول و ڈیزل کا اسٹاک وافر مقدار میں ہونا چاہیے۔انہوں نے کہا کہ عوام کو موجودہ صورتحال سے لمحہ بہ لمحہ آگاہ رکھا جائے،دریائوں کے پاٹ میں موجود مکانوں اور مویشیوں کے انخلا کو یقینی بنائیں۔ انہوں نے کہا کہ فلڈ ریلیف کیمپس میں خوراک، پینے کے صاف پانی و دیگر سہولیات کی فراہمی کو یقینی بنایا جائے،عوام جاری کردہ احتیاطی تدابیر پر عمل کریں،ہنگامی انخلا کی صورت میں انتظامیہ سے تعاون کریں ۔ڈی جی پی ڈی ایم اے نے کہا کہ عوام کے جان و مال کا تحفظ پنجاب حکومت کی اولین ترجیح ہے ،شہری ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں ۔