منہاج ویلفیئر کاسیلاب متاثرہ علاقوں میں امدادی سرگرمیوں کا آغاز

اسلام آباد (اُردو پوائنٹ اخبارتازہ ترین - این این آئی۔ 19 جولائی2025ء)ملک کے مختلف حصوں میں حالیہ شدید بارشوں اور سیلاب سے پیدا ہونے والی ہنگامی صورتحال کے پیش نظر منہاج ویلفیئر فاونڈیشن نے فوری طور پرامدادی سرگرمیوں کا آغاز کر دیا ہے ۔ اسلام آباد میڈیا سیل کے مطابق راولپنڈی، چکوال، جہلم،و دیگر متاثرہ شہروں میں منہاج ویلفیئر فاونڈیشن کے رضا کار متحرک ہو چکے ہیں اور متاثرین کی فوری مدد کیلئے مختلف مراحل میں امدادی سرگرمیوں کا آغاز کر دیا گیا ہے ۔

منہاج ویلفیئر فاونڈیشن کے ڈائریکٹر آپریشنز انجینئر ثنااللہ خان نے ہنگامی اجلاس میں گفتگو کرتے ہوئے کہا ہے کہ امدادی سرگرمیوں کے پہلے فیز میں متاثرہ علاقوں میں پکا ہوا تاذہ کھانا روزانہ کی بنیاد پر تقسیم کیا جا رہا ہے تا کہ وہ خاندان جو گھروں سے محروم ہو چکے ہیں یا جو خوراک تک رسائی نہیں رکھتے بھوک اور غذائی قلت کا شکار نہ ہوں۔

(جاری ہے)

انہوں نے کہاکہ کھانے کی تیاری فیلڈ کچن اور موبائل کچن یونٹس کے ذریعے کی جا رہی ہے۔ منہاج ویلفیئر فاونڈیشن کے رضا کاروں کو ہدایات جاری کی گئی ہیں کہ بچوں،خواتین اور بزرگوں کی غذائی ضروریات پر خصوصی توجہ دی جائے۔ثنا اللہ خان نے بتایا کہ شیخ الاسلام ڈاکٹر محمد طاہر القادری کی ہدایات پر عمل کرتے ہوئے دوسرے فیز میں متاثرین کو خشک راشن،ترپالیں،کپڑے اور ابتدائی طبی امداد فراہم کی جائے گی۔

عارضی شیلٹرز کیمپوں کے قیام اور صفائی کے اقدامات کئے جائیں گے ۔اس حوالے سے منہاج ویلفیئر فائونڈیشن کی سروے ٹیمیں متاثرین کا ڈیٹا اکٹھا کر رہی ہیں۔انہوں نے بتایا کہ منہاج ویلفیئر فاونڈیشن تیسرے فیز میں متاثرہ خاندانوں کی بحالی گھروں کی مرمت اور بچوں کی تعلیم کی بحالی کے اقدامات کرے گی ۔انہوں نے کہا کہ یہ وقت آزمائش کا ہے اور ہم متاثرہ ہم وطنوں کو تنہا نہیں چھوڑیں گے۔

ثنااللہ خان نے کہا کہ منہاج ویلفیئر فاونڈیشن کا ہنگامی رسپانس نیٹ ورک متحرک کر دیا گیا ہے، اور رضاکاران ہر ممکن وسائل کے ساتھ موجود ہیں تاکہ متاثرہ خاندانوں تک فوری امداد پہنچائی جا سکے۔انہوں نے مزید کہا کہ ہم ملک بھر میں ممکنہ سیلابی صورتحال پر گہری نظر رکھے ہوئے ہیں، اور جہاں کہیں بھی ضرورت محسوس ہو گی، فوری رسپانس کے تحت امداد پہنچائی جائے گی۔ انہوں نے کہاکہ منہاج ویلفیئر فاونڈیشن خدمت انسانیت کے مشن پر کاربند ہے۔اجلاس میں ڈپٹی ڈائریکٹرز اشتیاق حنیف مغل، منصور قاسم اعوان، رانا فیصل محمود، شفقت ندیم و دیگر عہدیداران بھی موجود تھے۔