عالمی اعزازات پاک فضائیہ کی پیشہ ورانہ مہارت، جدید فضائی تیاری عالمی معیار کی تربیت کا منہ بولتا ثبوت ، وفاقی وزیر داخلہ محسن نقوی کی رائل انٹرنیشنل شو میں ٹرافیاں جیتنے پر شاہینوں کو مبارکباد

اسلام آباد (اُردو پوائنٹ اخبارتازہ ترین - اے پی پی۔ 20 جولائی2025ء) وفاقی وزیر داخلہ محسن نقوی نے کہا ہے کہ عالمی اعزازات پاک فضائیہ کی پیشہ ورانہ مہارت، جدید فضائی تیاری اور عالمی معیار کی تربیت کا منہ بولتا ثبوت ہیں،پاک فضائیہ کی ٹیم نے دنیا کے سب سے بڑے ایئر شو میں ایسا عملی مظاہرہ کیا جس نے دنیا کی بڑی فضائی قوتوں کو بھی داد دینے پر مجبور کر دیا،حالیہ پاک بھارت کشیدگی میں دشمن کے فضائی عزائم خاک میں ملانے والی پی اے ایف نے عالمی سطح پر بھی اپنی سبقت کا لوہا منوایا،پی اے ایف صرف ایک فضائیہ نہیں بلکہ قومی جذبے کا پرچم بردار ادارہ ہے۔

وزارت داخلہ سے جاری بیان کے مطابق وفاقی وزیر داخلہ محسن نقوی نے پاکستان ایئر فورس کو رائل انٹرنیشنل شو میں دو ٹرافیاں جیتنے پر زبردست الفاظ میں خراج تحسین پیش کرتے ہوئے کہا کہ پاک فضائیہ کے شاہینوں کو عالمی اعزازات پر دل کی گہرائیوں سے مبارکباد پیش کرتا ہوں۔

(جاری ہے)

محسن نقوی نے کہا کہ رائل انٹرنیشنل ایئر شو 2025 میں پاکستان فضائیہ نے جے ایف - 17 تھنڈر اور سی-130 ہرکولیس کی بدولت “Spirit of the Meet” اور “Concours d’Élégance” ٹرافیاں جیت کر تاریخ رقم کی ہے۔

وفاقی وزیر نے کہا کہ یہ عالمی اعزازات پاک فضائیہ کی پیشہ ورانہ مہارت، جدید فضائی تیاری اور عالمی معیار کی تربیت کا منہ بولتا ثبوت ہیں۔محسن نقوی نے کہا کہ ایئر چیف مارشل ظہیر احمد بابر سندھو کی ولولہ انگیز قیادت میں پاک فضائیہ نے ایک بار پھر دنیا کو دکھا دیا کہ پاکستان کی فضاؤں کے محافظ ہر میدان میں تیار ہیں،پاک فضائیہ کی ٹیم نے دنیا کے سب سے بڑے ایئر شو میں ایسا عملی مظاہرہ کیا جس نے دنیا کی بڑی فضائی قوتوں کو بھی داد دینے پر مجبور کر دیا۔

محسن نقوی نے کہا کہ حالیہ پاک بھارت کشیدگی میں دشمن کے فضائی عزائم خاک میں ملانے والی پی اے ایف نے عالمی سطح پر بھی اپنی سبقت کا لوہا منوایا،یہ جیت ایک مضبوط اور خوددار پاکستان کا عالمی اعزاز ہے، جہاں جذبہ، علم اور ٹیکنالوجی قومی دفاع کے ستون ہیں۔وفاقی وزیر داخلہ نے کہا کہ پی اے ایف صرف ایک فضائیہ نہیں بلکہ قومی جذبے کا پرچم بردار ادارہ ہے۔

محسن نقوی نے کہا کہ پی اے ایف کے شاہینوں نے آسمان پر صرف طیارے نہیں، قوم کا وقار اور اعتماد بھی بلند کیا،یہ کامیابی نہ صرف ایک فضائی مظاہرہ ہے بلکہ ایک پیغام ہے کہ ’’پاکستان تیار ہے، ہر چیلنج کے لئے، ہر افق کے لئے‘‘۔وفاقی وزیر داخلہ محسن نقوی نے مزید کہا کہ قوم اپنے شاہینوں، انجینئرز اور قائدین کو سلام پیش کرتی ہے، جنہوں نے ایئر چیف مارشل ظہیر احمد بابر سندھو کی قیادت میں پاکستان کا نام فضاؤں سے بھی بلند کر دیا۔