خیبرپختونخواہ اسمبلی کا اجلاس ملتوی؛ مخصوص نشستوں پر حلف برداری نہ ہوسکی، اپوزیشن کا عدالت جانے کا اعلان

صوبہ سیاسی نابالغوں کے ہاتھوں میں ہے، یہ چاہتے ہیں سیاسی سپیس کسی اور کے حوالے نہ کرو، غیرآئینی کام کیلئے رات 12 بجے بھی سیشن بلاتے ہیں؛ اپوزیشن لیڈر ڈاکٹرعباداللہ کی گفتگو

ساجد علی اتوار 20 جولائی 2025 12:15

خیبرپختونخواہ اسمبلی کا اجلاس ملتوی؛ مخصوص نشستوں پر حلف برداری نہ ..

پشاور ( اُردو پوائنٹ اخبارتازہ ترین۔ 20 جولائی 2025ء ) خیبرپختونخواہ اسمبلی میں مخصوص نشستوں پر منتخب اراکین کی حلف برداری نہ ہوسکی اور اجلاس ملتوی کردیا گیا، جس کے خلاف اپوزیشن نے عدالت جانے کا اعلان کردیا۔ تفصیلات کے مطابق حلف برداری کے لیے طلب کیا گیا اجلاس ڈھائی گھنٹے تاخیر سے شروع ہوا، خیبرپختونخواہ اسمبلی کے اجلاس کی صدارت سپیکر بابر سلیم سواتی نے کی، اجلاس میں مخصوص نشستوں پر نومنتخب ارکان اور اپوزیشن کے تمام ارکان شریک ہوئے لیکن اجلاس میں پی ٹی آئی کے چند ارکان موجود تھے کیوں کہ پی ٹی آئی کی پارلیمانی پارٹی نے اسمبلی اجلاس کے بائیکاٹ کا فیصلہ کیا تھا اور اجلاس کے آغاز پر ہی کورم کی نشاندہی کردی گئی۔

بتایا گیا ہے کہ ایم پی اے شیر علی آفریدی نے کورم کی نشاہدہی کی اور حکومتی اراکین کورم کی نشاہدہی کرکے ہال سے نکلنا شروع ہوگئے، اس دوران اپوزیشن اراکین نے سپیکر کو حلف لینے پر آمادہ کرنے کی کوشش کی، جس پر سپیکر نے کہا کہ ’اسمبلی میں ارکان کی تعداد 25 ہے، کورم پورا نہیں ہے‘، اس پر خاتون رکن اسمبلی نے کہا کہ ’تلاوت کے دوران کوئی کورم کی نشاندہی نہیں کرسکتا‘، سپیکر نے خاتون کو جواب دیا کہ ’تقریریں نہ کریں پہلے کورم کی گنتی کرلیں‘۔

(جاری ہے)

معلوم ہوا ہے کہ اپوزیشن کی جانب سے اسمبلی میں نعرے بازی شروع کردی گئی اور اپوزیشن ارکان اسپیکر ڈائس کے سامنے جمع ہوگئے، اس دوران خیبرپختونخواہ اسمبلی کا اجلاس 24 جولائی دن 2 بجے تک کیلئے ملتوی کردیا گیا۔ بتایا جارہا ہے کہ اپوزیشن لیڈر عباداللہ نے حکومت کی جانب سے حلف برداری اجلاس میں کورم کی نشاندہی اور اجلاس ملتوی کرنے پر عدالت جانے کا اعلان کردیا، انہوں نے کہا کہ غیرآئینی کام کیلئے رات 12 بجے بھی سیشن بلاتے ہیں، سیاسی نابالغ 12 سال سے خیبرپختونخواہ میں بیٹھے ہیں، پی ٹی آئی نے گورننس اور دیگرچیزوں میں تباہی کی، اب پی ٹی آئی والے اسمبلی کے ساتھ بھی کھلواڑ کر رہے ہیں، یہ چاہتے ہیں سیاسی اسپیس کسی اور کے حوالے نہ کرو، ایک سال سے سینیٹ میں خیبرپختونخواہ صوبے کی نمائندگی نہیں ہے، 50 فیصد خواتین کی نمائندگی نہیں ہے، ایوان میں اقلیتوں کی نمائندگی نہیں ہے اور یہ حلف نہیں لے رہے۔