Live Updates

وزارت موسمیاتی تبدیلی آئندہ برس کے مون سون کیلئے ابھی سے تیاری شروع کردے

پاکستان کو موسلادھار بارشوں و سیلاب سے بچانے اور نقصانات کو کم سے کم کرنے کیلئے دو ہفتوں میں جامع لائحہ عمل پیش کیا جائے، سیلاب متاثرین کی بحالی ہماری ترجیح ہے۔ وزیرِاعظم محمد شہباز شریف

ثنااللہ ناگرہ جمعہ 5 ستمبر 2025 21:11

وزارت موسمیاتی تبدیلی آئندہ برس کے مون سون کیلئے ابھی سے تیاری شروع ..

اسلام آباد (اُردو پوائنٹ اخبارتازہ ترین۔ 05 ستمبر2025ء) وزیرِاعظم محمد شہباز شریف نے کہا ہے کہ وزارت موسمیاتی تبدیلی آئندہ برس کے مون سون کیلئے ابھی سے تیاری شروع کردے، پاکستان کو موسلادھار بارشوں و سیلاب سے بچانے اور نقصانات کو کم سے کم کرنے کیلئے دو ہفتوں میں جامع لائحہ عمل پیش کیا جائے۔ تفصیلات کے مطابق وزیرِ اعظم محمد شہباز شریف کی زیرصدارت حالیہ بارشوں و سیلاب کے نقصانات اور جاری امداد و بحالی کی سرگرمیوں پر جائزہ اجلاس آج اسلام آباد میں منعقد ہوا۔

وزیرِ اعظم محمد شہباز شریف نے کہا کہ حالیہ بارشوں و سیلاب کے متاثرین کی بحالی ترجیح ہے، ملک کے جنوبی حصوں میں دریاؤں سے ملحقہ علاقوں کے حوالے سے تیاری یقینی بنائی جائے۔ وفاقی حکومت صوبائی حکومتوں کی ہر قسم کی معاونت کیلئے ہمہ وقت تیار ہے۔

(جاری ہے)

لوگوں کے بروقت انخلاء اور امدادی سرگرمیوں کی لمحہ بہ لمحہ نگرانی یقینی بنائی جائے۔ وزیرِ اعظم نے کہا کہ سیلاب متاثرین کی مکمل بحالی تک وفاقی حکومت صوبائی حکومتوں کے ساتھ مل کر کام جاری رکھے گی۔

ایسے متاثرین جو نادرا کے ساتھ رجسٹرڈ نہیں، ان تک مالی معاونت پہنچانے کیلئے کمیٹی قائم کی جائے۔ وزیرِ اعظم نے کہا کہ وزارت موسمیاتی تبدیلی آئندہ برس کی مون سون کیلئے ابھی سے تیاری کرے۔ پاکستان کو موسمیاتی تبدیلی کے مضر اثرات بشمول موسلادھار بارشیں و سیلاب سے بچانے اور انکے نقصانات کو کم سے کم کرنے کیلئے دو ہفتے میں ایک جامع لائحہ عمل پیش کرے۔ این ڈی ایم اے، پی ڈی ایم ایز، پاک فوج اور ریسکیو و ریلیف کے وفاقی و صوبائی اداروں کی لوگوں کے ریسکیو و ریلیف کیلئے کاروائیاں قابل تحسین ہیں۔ وزیرِ اعظم محمد شہباز شریف کی زیر صدارت حالیہ طوفانی بارشوں و سیلابی صورتحال اور جاری امدادی سرگرمیوں و بحالی کیلئے جائزہ اجلاس آج اسلام آباد میں منعقد ہوا۔