چیئرپرسن ویمن کمیشن ریحانہ خان کا میجر رب نواز گیلانی کی شہادت پر اظہارِ افسوس

اتوار 20 جولائی 2025 14:45

مظفرآباد (اُردو پوائنٹ اخبارتازہ ترین - این این آئی۔ 20 جولائی2025ء)چیئرپرسن ویمن کمیشن آزاد کشمیر محترمہ ریحانہ خان نے بلوچستان کے ضلع آوران میں دہشت گردوں کے خلاف آپریشن کے دوران جامِ شہادت نوش کرنے والے پاک فوج کے افسر میجر رب نواز گیلانی کی شہادت پر گہرے رنج و غم کا اظہار کیا ہے۔

(جاری ہے)

ریحانہ خان نے اپنے تعزیتی بیان میں کہا کہ میجر رب نواز گیلانی کا تعلق مظفرآباد سے تھا اور وہ ایک دلیر، فرض شناس اور محب وطن آفیسر تھے جنہوں نے مادرِ وطن کے تحفظ کے لیے اپنی جان قربان کر دی۔

انہوں نے کہا کہ شہید رب نواز گیلانی کی قربانی نہ صرف آزاد کشمیر بلکہ پوری قوم کے لیے باعث فخر ہے۔انہوں نے کہا کہ پاک فوج کے جوان اور افسران وطن کے دفاع کے لیے ہمہ وقت تیار ہیں اور میجر رب نواز کی قربانی اس عزم کی واضح مثال ہے۔ چیئرپرسن نے شہید کے اہلِ خانہ سے دلی ہمدردی کا اظہار کرتے ہوئے دعا کی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور پسماندگان کو صبر جمیل دے۔