طلال چوہدری نے ٹی ٹی پی کا وٹس ایپ چینل بے نقاب کردیا، عالمی برادری سے بڑا مطالبہ

دہشت گردتنظیم اپنا نفرت انگیز بیانیہ پھیلانے اوردہشت گردی کی کارروائیوں کو جوازدینے کیلئے پیغامات بھیجتی ہے، وزیرمملکت

اتوار 20 جولائی 2025 22:00

اسلام آباد(اُردو پوائنٹ اخبارتازہ ترین - این این آئی۔ 20 جولائی2025ء)وزیرمملک برائے داخلہ طلال چوہدری نے ٹی ٹی پی کا دہشت گردی کی کارروائیوں اور پیغام رسانی کیلئے استعمال ہونے والا وٹس ایپ چینل بے نقاب کردیا ہے۔سماجی رابطے کی ویب سائٹ ایکس پر جاری بیان میں طلال چوہدری نے کہا کہ امریکا اور اقوام متحدہ کی جانب سے دہشت گرد قرار دی گئی کالعدم ٹی ٹی پی اپنا وٹس ایپ چینل چلا رہی ہے اور اپنا انتہاپسندانہ اور نفرت انگیز نظریات پھیلانے کیلئے بڑے پیمانے پر وٹس ایپ پیغامات بھیجے جاتے ہیں۔

انہوں نے کہا کہ ٹی ٹی پی اپنا نفرت انگیز بیانیہ پھیلانے اور دہشت گردی کی کارروائیوں کو جواز بخشنے کیلئے ان حربوں کا استعمال کرتی ہے۔سینیٹر طلال چوہدری نے کہا کہ پاکستان کی جانب سے مذکورہ گروپس کے بارے میں زیرو ٹالرنس رکھا گیا ہے اور بین الاقوامی امن یقینی بنانے کیلئے بے پناہ قربانیاں دی ہیں۔

(جاری ہے)

وزیرمملکت نے کہا کہ ہم عالمی برادری اور وٹس ایپ سے درخواست کرتے ہیں کہ اس ناسور کے خلاف لڑنے کیلئے ہمارے ساتھ تعاون کریں۔

انہوں نے کہا کہ ان اکانٹس کو بند اور خودکار انداز میں نشان دہی کے لیے ضروری الگوریتھم ترتیب دینا اور اس طرح کے اکانٹس اور نمبروں کو خود بخود معطل کرنا ضروری ہے۔طلال چوہدری نے عالمی برادری اور وٹس ایپ انتظامیہ کو اپیل کے ساتھ دہشت گردوں کے اکاؤنٹس کی تفصیل بھی دے دی ہے۔