کراچی‘ لانڈھی میں اینٹی واٹر تھیفٹ سیل کی کارروائی

چوری میں ملوث تین ٹیکسٹائل فیکٹریز کیخلاف مقدمات درج کرلیے گئے‘ترجمان واٹر کارپوریشن

پیر 21 جولائی 2025 12:31

کراچی (اُردو پوائنٹ اخبارتازہ ترین - این این آئی۔ 21 جولائی2025ء)کراچی کے علاقے لانڈھی میں واٹر کارپوریشن کے اینٹی واٹر تھیفٹ سیل کی کارروائی، روزانہ ہزاروں گیلن پانی کی چوری پکڑی گئی، چوری میں ملوث تین ٹیکسٹائل فیکٹریز کیخلاف مقدمات درج کرلیے گئے۔ترجمان واٹر کارپوریشن کے مطابق لانڈھی لیبر اسکوائر اسپتال چورنگی کے قریب سی او او واٹر کارپوریشن انجینئر اسد اللہ خان کی سربراہی میں اینٹی واٹر تھیفٹ سیل نے کارروائی کی۔

ہالیجی کنڈیوٹ سے غیر قانونی 6 انچ سمر پمپ کے ذریعے پانی چوری کیا جارہا تھا، روزانہ ہزاروں گیلن پانی چوری کیا جا رہا تھا، کارروائی میں تمام غیر قانونی سمر پمپ منقطع کر دیے گئے۔پانی چوری میں ملوث تین ٹیکسٹائل فیکٹریز پائی گئیں، تینوں ٹیکستائل فیکٹریوں کے خلاف پانی چوری کا مقدمہ درج کرادیا گیا۔

(جاری ہے)

قائد آباد میں بھی کارروائی کرتے ہوئے مرکزی لائن سے غیر قانونی کنکشن کاٹ دیئے گئے، مہران ٹاؤن ہائی وے پر پانی چوری کے لیے کیا گیا غیر قانونی کنکشنز، پائپ اور مشینری پکڑی گئی۔

سی او او واٹر کارپوریشن اسد اللہ خان کا کہنا ہے کہ ملوث عناصر کے خلاف سخت قانونی کاروائی کی جائے گی، پانی چوروں کو کسی صورت معاف نہیں کیا جائے گا اور واٹر کارپوریشن کا کوئی اہلکار ملوث پایا گیا تو سخت ایکشن ہوگا۔