وزیرداخلہ محسن نقوی کا ایف آئی اے ہیڈ کوارٹرکا دورہ، یادگارشہداء پرحاضری ، پھول رکھے،فاتحہ خوانی کی، شہداء کی عظیم قربانیوں کوخراج عقیدت

اسلام آباد(اُردو پوائنٹ اخبارتازہ ترین - این این آئی۔ 21 جولائی2025ء)وفاقی وزیر داخلہ محسن نقوی نے ایف آئی اے ہیڈکوارٹر اسلام آباد کا دورہ کیا۔وزیر داخلہ محسن نقوی نے ایف آئی اے کے شہداء کی یادگار پر حاضری دی اور یادگار شہداء پر پھول رکھے اور فاتحہ خوانی کی۔ وزیرداخلہ محسن نقوی نے شہداء کی عظیم قربانیوں کو زبردست الفاظ میں خراج عقیدت پیش کیا۔

وزیر داخلہ محسن نقوی نے ایف آئی اے ہیڈکوارٹر میں اعلیٰ سطح کے اجلاس کی صدارت کی۔ اجلاس میں ایف آئی اے کی جدید خطوط پر تنظیم نو کا فیصلہ کیا گیا، اس ضمن میں وزیرداخلہ نے جامع پلان طلب کر لیا۔ انہوں نے ادارے کو مزید فعال بنانے کیلئے قوانین اور رولز میں ضروری ترامیم پر فوری کام کا آغاز کرنے کی ہدایت کی۔ وزیرداخلہ محسن نقوی نے ایف آئی اے کے لئے فوری طور پر جدید ٹیکنالوجی اور مطلوبہ ہتھیاروں کی منظوری دی۔

(جاری ہے)

وفاقی وزیرداخلہ محسن نقوی نے اس بات پر زور دیا کہ ایف آئی اے کو حکومت کے ساتھ عوام کی توقعات پر پورا اترنا ہوگا، کارکردگی پر ہی ایف آئی اے کو مزید مراعات دی جائیں گی۔ انہوں نے ایف آئی اے حکام کو ہدایت کی کہ غیر قانونی امیگریشن میں ملوث مافیا سے آہنی ہاتھوں سے نمٹا جائے، بے رحمانہ کریک ڈاؤن کیا جائے اورزیرو ٹالرنس پالیسی اپنائی جائے۔

انہوں نے واضح کیا کہ ملک کی بدنامی کے ذمہ دار عناصر کو روکنا ایف آئی اے کی اولین ذمہ داری ہے۔ انہوں نے ہدایت کی کہ شہریوں کی سہولت کیلئے ائیرپورٹس پر امیگریشن عمل کو آسان اور سہل بنایا جائے۔ اس سلسلے میں وزیر داخلہ نے ایف آئی اے کو فاسٹ ٹریک کاؤنٹر قائم کرنے کی ہدایت کی۔وزیر داخلہ محسن نقوی نے نصاب کو جدید خطوط کے مطابق بنانے کی بھی ہدایت کی۔

وزیر داخلہ نے سٹاف کی کمی کے پیش نظر منظور شدہ خالی آسامیوں پر فوری بھرتی کی ہدایت کی۔ وزیر داخلہ محسن نقوی نے ہیڈکوارٹر کی عمارت کی بحالی کے لیے ماسٹر پلان بھی طلب کیا۔ وزیر داخلہ نے ایف آئی اے اکیڈمی کو نئی الاٹ کی گئی زمین پر منتقل کرنے کی ہدایت کی۔ وزیر داخلہ نے کراچی زونل آفس کی بحالی بھی جلد از جلد کرانے کی ہدایت کی۔ ڈی جی ایف آئی اے راجہ رفعت مختار نے وزیر داخلہ کو ادارے میں جاری اصلاحات پر بریفنگ دی۔ وزیر مملکت داخلہ طلال چوہدری، سیکرٹری داخلہ، چیثرمین سی ڈی اے سمیت ایف آئی اے کے اعلیٰ افسران بھی اس موقع پر موجود تھے۔