چین میں پاکستان کے سفارتخانے میں یوم دفاع و شہداء کی تقریب ، سفیر خلیل ہاشمی نے پرچم کشائی کی

پیر 8 ستمبر 2025 16:59

بیجنگ (اُردو پوائنٹ اخبارتازہ ترین - اے پی پی۔ 08 ستمبر2025ء) چین میں پاکستان کے سفارتخانے میں پیر کو یوم دفاع و شہدا پاکستان انتہائی عقیدت و احترام کے ساتھ منایا گیا۔ اس موقع پر ایک پروقار پرچم کشائی کی تقریب منعقد ہوئی جس میں سفارتخانے کے افسران، چین میں مقیم پاکستانی کمیونٹی کے اراکین اور میڈیا نمائندگان نے شرکت کی۔تقریب کے دوران چین میں پاکستان کے سفیر خلیل ہاشمی نے پرچم کشائی کی۔

(جاری ہے)

اپنے خطاب میں سفیر خلیل ہاشمی نے مادر وطن کے ان جری سپوتوں کو خراج عقیدت پیش کیا جنہوں نے دشمن کے ناپاک عزائم کو ناکام بناتے ہوئے بے مثال جرات، عزم اور پیشہ ورانہ صلاحیت کے ساتھ ملک کا دفاع کیا۔ انہوں نے کہا کہ پاک افواج کی قربانیاں اور وطن کے دفاع کے عزم کو کبھی فراموش نہیں کیا جا سکتا۔ سفیر نے افواج پاکستان کی پیشہ ورانہ مہارت، نظم و ضبط اور بہادری کو سراہا۔اس موقع پر انہوں نے پاکستان اور چین کے دیرینہ دوستانہ تعلقات پر روشنی ڈالتے ہوئے خطے میں امن اور استحکام کے فروغ کے لیے پاکستان کے عزم کا اعادہ بھی کیا۔